Jerez-ah Marquez a kir dawn

Pathianni tlai dar 5:30 hian MotoGP Spanish Grand Prix an tlan dawn, inelna an neihna tur hmun Circuito de Jerez hi tun hma lama Marc Marquez lo chetsual tawhna hmun a ni.

Kum 2020 kha a ni a, khatih laia rider ṭha leh chungnung tak Marquez chu Jerez tlankawngah hian a chesual a, zai a ngai hial. A kut ruh tliak an zaina a dam mai thei lo a, zai nawn fo niin ngai a awh leh mai tawh lo.

Season li a liam a, tunah chuan Marquez hian ṭha takin season bul a ṭan leh tawh. Tun kar tawp intlansiak an neih turah pawh hian chak tura rinkai a ni leh dawn, championship hmahruaitu a ni mek bawk.

Spanish rider Marquez chuan, "Tun hma lama ka nihna ang kha chu ka nei phak tawh kher lo ang, mahse kuminah hian beiseina thar nen hmalam ka pan mek a, kan ram a nih bakah tun hma lama thawnthu tam tak ka lo neih tawhna hmun a nih avangin ka phur hle," tiin a sawi.