Jesus leh Walker te an positive

Manchester City striker Gabriel Jesus leh defender Kyle Walker ten Covid-19 an vei tih hmuhchhuah a ni a, zanin dar 1:30-a Newcastle United an mikhual hunah an inlan thei lo ang. 

Jesus leh Walker bakah staff zinga mi pahnih ten coronavirus an vei tih hmuhchhuah a ni a, Premier League leh sorkar dan angin an inkhung hrang dawn. Pep Guardiola-a'n a player pawimawh pahnih hi Newcastle United bakah Everton (December 28 zan) leh nakkum January 3-a Chelsea nen an inkhelh hunah a chhawr thei lo ang. 

Man City tana thu lawmawm erawh Sergio Aguero a dam tawh a, Argentine forward hian Brazilian forward Jesus hmunruak hi a luah khat nghal thei ang. Brazlian forward Jesus hian  tun season-ah goal li a chauh a la khung a, chutihrualin inhliam vangin thla khat chhung chawlh a nei tih hriat tel a ṭha.

Kum 30 mi Walker erawh Covid-19 positive hma zawngin chhawr theih turin a awm reng. Chutihrualin kumin May thla khan coronavirus dan a bawhchhiat avangin ngaihdam a dil tawh.

Man City hian hmahruaitu Liverpool point riatin an la pha lo a, match khatin an la khel tlem thung. Pep Guardiola hote hian champion an tum a nih chuan chetsual a thiang tawh lo a, Etihad Stadium-ah Newcastle United an hneh ngei a ṭul dawn a ni.

Fulham boss Scott Parker pawhin Covid-19 a vei tih hmuhchhuah a ni a, zanin dar 8:30-a Southampton nen an inkhelh hunah a team a ho thei dawn lo. Amaherawhchu Parker hi tunkar chhung a inkhung tawh avangin test a hmachhawn leh huna a negative chuan December 30 zana Tottenham an tlawh hunah technical area-ah a ṭhu leh thei tawh ang.