"Ngawi rih lawk rawh Khatla" – Zarkawt
April 25, Zirtawpni a ni a, zan dar 7:00-ah chuan R. Dengṭhuama Indoor Stadium-ah ticket chan loh hlauin fans an intlar put tawh–a chhan maw? Khatla TBL leh Zarkawt BCA ten Sharda University Mizoram Super League X final game 2 an khelh dawn vang a ni.
Tlai dar 3:00 velah khan online-a ticket zawrhchhuahna triket.in chuan Rs. 300 man ticket chu an hralh zo vek tawh! Final game 1-a hnehna chang Khatla TBL-in a vawi li nan champion nomawi chawi an tum a, vawi khat chauh an chak leh pawhin an champion tawh dawn tih an hai lo.
R. Dengṭhuama Indoor Stadium pawh champion lawm turin a inpeih–fans an khat hmur a, nomawi chhawpchhuah a ni a, official ṭhutna lamah pawh 'a tawpna' a nih takin tiin, sponsor leh sawm bikte an ṭhu khat tlat a, sports minister Lalnghinglova Hmar pawh champion hnena nomawi hlan turin a awm ran a, Khatla TBL fan-ten nomawi an thlek sek a nih pawhin an demawm lo e!
Mahse, Zarkawt BCA-in ngaihdan dang an nei–MSL champion ngun ber club hian match hnih lek hmanga champion chinfel mai an rem ti lo a, final game 3-na hmanga champion tur chinfel an duh. Game 1-a an hneh loh Khatla TBL chu 83-77 in an hneh a, "Ngawi rih lawk rawh aw, Khatla..." tiin champion lawm tum Khatla an beng dai.
Cho leh cho
Khatla TBL-in nomawi chawi vat vat an duh avangin a tir aṭangin Zarkawt an ngam nghal 'sarh' a, game 1-a tlawm tawh BCA hi an talbuai hman–team pahnih an inngam tawn a, tlawm bik nih tum loa an innawr tawn zak zak chu hmuhnawm a tling.
Hetihrual hian Zarkawt BCA-in an nawr luatah, Khatla vuak let an dawl zo lo ṭhin niin a lang a, Khatla mipui thawm a ṭhat bawk avangin boruak sangah Zarkawt player-te an talbuai em ni chu aw, a tih theih.
Khatla tan Vanlalṭhazuala'n player ṭha bik a ni tih pholangin, quarter khatna aṭangin Zarkawt BCA tan buaipui thamin a khel a, Nary James lah manganpui tham khawp player a nih bawk avangin BCA an talbuai.
Khatla hian quarter khatna chu 25-19 in an la nghal pang a, game 1-ah mai ni lo, league round-ah pawh Zarkawt BCA hi an lo hneh tawh avangin game 2-ah champion kan hmu nghal ngei dawn nia ngaihna a lian hman.
Mahse maw...
Infiamna khawvel mawina chu, beiseina nei tawh lo nia kan ngaihten beiseina an nei thar leh ṭhin hi a ni. Quarter hnihna a her chhuak a, Zarkawt BCA-in boruak an ngam thar a, an phur tulh tulh em ni chu aw tih mai tur a ni–veng mipui thawmin a pui ṭha takzet bawk.
BCA hian quarter hnihna chu 24-19 in an la a, hemi hnu hi chuan an tlu leh tawh lo–quarter thumna pawh 21-17 in an la a, quarter lina 19-16 a la zuiin, a tawpah chuan chak phu zawkin hnehna an chang tih loh rual a ni lo a, thawnthu a inthlak danglam chiang hle.
Vanlalṭhazuala'n a 'class' pholangin, game mawi leh hmuhnawm min chhawpsak a, point 26 ngawt a score. Mahse, a tawpah chuan a chet ṭhat a tawk zo lo a, Emmanuel VL Awmpuia pawhin point 19 nei leh mah se, a tawk zo lo.
Nary James-a'n point 19 score-in, rebound vawi 15 a la a, a che ṭha lo tih chi a ni lo. Chutihrual chuan Khatla coach H. Laldinsanga'n Nary James hi a mamawh hahdamna hun a pe tlem hret em ni aw, tih chu zawhna awm thei a ni a, inkhel tawp lam, inum boruak san vanglaiin US tlangval hi hmuh tur a tam tawk lo.
Kha le Zonuna!
Zarkawtin hliam vangin Lalrina Renthlei an chhawr thei lo a, India international tel lo hian an invaivung thei tawk lo em ni aw, tihpalh mai a awl hman–mahse, a rei tulh tulh a, Zarkawt BCA-in Mizo player tawnhriat nei ṭha an kawlte hlutna a lang.
Boruak sangah pawh Matthew Remtluanga Sailo a 'cool' dup reng a, an inum boruak sang taka a naute chi ai tur a hum ṭha hle–point 10 a score bakah rebound 11 a la. R. Lalnunpuia pawhin point 13 ngawt score-in, rebound 11 a la a, 'R-a' kan hriat ṭhin kha a la ni reng tih a pholang nawn.
Zonunsanga hming lam hmaih a thiang lo–Mizo point guard ṭha mi hian point 14 ngawt a score bakah, rebound 13 a la a, inkhel boruak sangah amah chi ai miah si loa Khatla TBL player chhaih thinrim hun a hria a, a che vel pawh hmuhnawm a tling thlawt.
Player of the Match-a thlan zui Zonuna hi 'playmaker ṭha mi' tih loh rual a ni lo–H. Lalhmachhuana pawhin point 14 ngawt a rawn score a, BCA hian 'teamwork' ṭha chu an chakpui a tih ngam.
Lalrina tan
Zarkawt BCA coach Marc Lalthlamuana Sailo chuan, "Zaninah hliam vangin Lalrina a inlan ve thei lo a, kan hre reng. Rilrua amah hre reng chungin kan khel a, kan chak pawh hi a tan kan hlan a ni" tiin Vanglaini a hrilh–Lalrina hi final game 1-ah a khupah a inhliam a, thla riat vel tal a chawlh a ngai dawn.
BCA-in Khatla an lehthal theih chhanah Marc-a chu fak phu a ni a, a player siksawi hun fuh ṭhin chu a tihfuh a ni–Marquis Cunningham pawhin minute nga leh second 36 chiah khel mah se, point ruk a score hram!
Khatla tana Sahat Kumar Patel hnawksakzia kha aw! India international hian point 15 a neih bakah, rebound 11 a la a, Justin Gnanaraj pawhin point 11 a score. Marc chuan, "Pathian vang liau liau a ni a, boruak sangah kan chi ai lo a, kan tifuh.
"Comeback ngei ngei kha kan tum a, kan theihtawp kan chhuah avangin hnehna kan chang a ni," tiin Vanglaini a hrilh–April 29, Thawhlehni zana final game 3 atan an inbuatsaih lehnghal ang.
A la tawp lo
Khatla TBL-in nomawi chawi an tum zanah hnehna an chang lo a, veng mipuite pawh Thawhlehni zanah an in auh khawm leh a ṭul dawn – he veng hian a vawi li nana MSL champion nih lawm an châk!
Mapuia chuan an chak lohnaah mawh a phurh thu sawiin, "Mawh ka phur. Zanina champion fel ka duh luatah Nary James pawh ka chhawr rei hret a, 'risk' ka la a, kan tifuh tawk ta rih lo a ni," tiin Vanglaini a hrilh.
India international hlui Mapuia chuan inkhel thlirkir zuiin, "Chak phu zawkin hnehna an chang a, an tlarhmate khan mi an rawn nawr na ṭhin lutuk a, an tiṭha thlawt a ni," a ti a, an khingpui team a fak.
Khatla hian MSL nomawi pathum an chawi tawh – a palina chawi an duh a, pahnih chawipui tawhtu Mapuia hian a vawi li nan nomawi chawipui leh se an duh. Mapuia chuan, "Game 3 chu kan la tawh ang, kan champion ang tih hi kan inringtawk a ni," tiin Vanglaini a hrilh – Khatla mipuite u, nui leh tawh rawh u le!
MSL Final
April 22, Thawhlehni Zan – Game 1
Khatla TBL 78–73 Zarkawt BCA
April 25, Zirtawpni Zan
Zarkawt BCA 83–77 Khatla TBL
April 29, Thawhlehni Zan
Zarkawt BCA 8:30 PM Khatla TBL