UCL khelh tum Chelsea leh Magpies an chak

Premier League ti ngaihnawmtu chu champion lam ni loin Champions League khelh inum a ni ta zawk. Inrinni zan khan Chelsea-in Everton 1-0 in an hneh a, London club result hre chunga inkhel Newcastle United-in Ipswich Town 3-0 in an sawp.

Enzo Maresca hote hian match 34 aṭangin point 60 an hmu a, UCL khel pha chin pangananah an awm. Magpies hian point 62 hmuin pathumnaah an awm thung. Liverpool leh Arsenal ten UCL an khel chiang tawh a, hmunruak pathum dang hi Newacastle United, Man City, Chelsea, Nottingham Forest leh Aston Villa ten an inchuh.

Match khat zelin

Stamford Bridge-ah Chelsea-in Nicolas Jackson hmangin minute 27-naah Everton lakah goal an khung a goal dang an khung belh tawh lo. Inkhelh banah Chelsea boss Enzo Maresca chuan, "Match khat zela kan ngaihtuah a ngai a, rilru fim kan put a ngai. Season tawpah kan dinhmun chu a hriat ang," tiin point thum hmuh a lawm thu a sawi a, goal hnihna khung lo mah se chak an phu thu a sawi.

Blues tan season tir lama che ṭha Cole Palmer-a'n goal a khung ngai ta meuh lo a, English midfielder hian sawisel a hlawh. Maresca chuan, "Nicolas Jackson-a'n goal a khung ta a, Cole Palmer pawhin a khung vat ka ring a, a khel ṭha e," tiin a sawi. Mahse, Palmer hian cross vawi thum a nei a, khingpuite box-ah ball vawi khat chiah a khawi a, a khel ṭha tawk lo.

Magpies an khawng

Newcastle United-in League Cup nomawi an chawi a, vanneih vanga champion an ni lo tih Premier League lamah pawh an lantir. Magpies hian inkhel thunun chungin Ipswich Town 3-0 in an hneh a; Alexander Isak, Dan Burn leh William Osula ten goal khat ṭheuh an khung.

Damloh vanga damdawi ina awm Eddie Howe a rawn let tawh a, Magpies-in an manager uapna hnuaiah an chak nghal. Howe chuan, "Ipswich khan goal venhim hna an thawk a, inkhelh tir lam khan a har hle. Ben Johnson an hnawhchhuah avangin kan tam zawk a, kha khan min pui. Goal khat kan khung hnuah kha chuan harsa a awm tawh lo," tiin a sawi.

Newcastle United boss hian UCL khelh tuma inchuhna chu season tawp thlenga boruak a sang tur thu a sawi a, Magpies ngei pawh hi Europe inelna sang bera tel lo thei an ni.