A hun têa rah FC Goa

Punjab FC-in Indian Super Cup quarterfinal aṭangin FC Goa an pet chhuak mai dawn emaw an inti a, mahse, minute 89 hnuah Goan club hian goal khungin an chak daih!

Bhubaneswar khawpuia inkhelah Punjab tan Ezequiel Vidal chuan minute 57-na lekah goal hmahruai a khung a, hei hi an chakpui mai dawn niin a lang hman.

Mahse, Goan club tan Borja Herrera chuan minute 89-naah si phurh a sut a, hun pek belh minute thumnaah Mohammed Yasir chuan chakna goal a khung zui!

Minute 90 rik hnaih thlenga 1-0 a hnufual Goa an chak ta daih a, Super Cup semifinal an lut - Goan club tan Ayush Chhetri chuan ṭum dang ang bawkin inkhel bul a ṭan.

Inrinni zan inkhel hmasa zawkah Mohun Bagan an chak bawk a, ISL champion hian Kerala Blasters chu 2-1 in an hneh - Kolkata club tan Sahal Abdul Samad leh Suhail Ahmad Bhat ten goal khat ve ve an khung a, Blasters tan hun pek belha Sreekuttan MS goal khungin awmzia a nei phak tawh lo.

Blasters-in coach thar David Català kaihhruaina hnuaiah a vawi khat nan tournament an hmachhawn a, an match hmasa zawkah champion lai East Bengal pet chhuak mah se, ISL double champion Mohun Bagan erawh an tan an ṭha hret - Bagan hian an player neih ṭhat ber an la thawhchhuahpui lo zui!

Bagan hian ISL Shield leh ISL Cup an la kawp a, hei vang hian Super Cup lamah chuan player chhawr rim rual an chawlh hahdamtir. Coach Jose Francisco Molina pawhin squad kaihruai loin, assistant coach Bastob Roy kaihhruaina hnuaiah an khel.

Kolkata club hian ISL-a chhawr rim player-te Super Cup-ah hian an hruai lo vek a, hei vang hian Bagan midfielder pawimawh Lalengmawia Ralte (Apuia) pawhin inelna hi a hmachhawn lo.

Hetihlai hian nikuma AFC Champions League Two atana an lakluh, ISL squad-a ziah luh ni ve ta lo, Panathinaikos defender hlui Nuno Reis chuan club tana a match hmasa ber a khel thung - Bagan hi Champions League Two-ah khan Iran-a zin an duh loh avangin an inhnukdawk a ni.

Super Cup - Quarterfinal

April 26, Inrinni Zan

Kerala Blasters 1 - 2 Mohun Bagan

KER: Sreekuttan MS 90+4'

MOH: Sahal Abdul Samad 22', Suhail Ahmad Bhat 51'

FC Goa 2 - 1 Punjab FC

FCG: Borja Herrera 89'; Mohammed Yasir 90+3'

PUN: Ezequiel Vidal 57'