Ngaihtea'n a pa tan a hlan

I League 2 chu Inrinni khan khelh zawh a ni a, Diamond Harbour-in an mual Naihati Stadium-ah nomawi an chawi. Kolkata club hian match hnuhnung berah FC Bengaluru United nen goal awm loin inhnethawk mah se Mizo club Chanmari FC-in an umpha thei lo. Diamond Harbour-ah hian Lungdai tlangval Lalngaihsaka leh Kolasib tlangval C. Lalhunmawia (Lahuna) te an tel a ni.

Ngaihtea chuan, "Ka pa hi football-a min tuipuitu ber a ni a, midangin min tuipui vak ṭhin lo. March 12, 2022 khan min boral san a, tuna kan hlawhtlinna hi ka pa tan hian ka hlan. Nomawi hi ka ngai hlu a, ka football tuipuitu pa hi ka ngai hlu takzet a ni," tiin Vanglaini a hrilh.

Lungdai tlangval hian a WhatsApp status-ah thlalak hlui hmangin kum 2009-a Salt Lake Stadium-a a pa nena an thlalak a hmang a, 'La awm ve la chu, kei ai pawhin nuam i ti ang' tih a ziak tel a ni.