Real tan red card pathum

Inrinni zana Copa del Rey final khelh hmain, Real Madrid-in chanchin maksak tak an nei a, match referee tur Ricardo de Burgos Bengoetxea chu final ham tura an rin tawk lohna an pholang!

Real TV channel chuan Ricardo-a'n Real inkhel a enkawla thutlukna a lo siam sual tawh ṭhin ṭhenkhat nasa takin an pholang a, a inkhel enkawlna hnuaiah 64% chiah hnehna an chan laiin, Barca chuan 81% an chan thu thlengin an pho chhuak.

Inkhelh hmaa press conference a hmachhawnnaah Ricardo hian hrehawm a tih thu sawiin, Real chet dan chuan a rilru a nghawng thu a sawi - a fate thlengin sikul lamah ṭawngkam ṭha lo tak taka beih an tawh phah.

Madrid khaw club hian referee hi 'pressure' an lo pe lawk ang hiala chhal theih a ni a, Atletico Madrid pawhin Real chet dan hi demin, "Spanish football hmai tibal tawh lo turin kan ngen a ni," an ti hmiah!

Hetiang boruak karah Ricardo hian inkhel a enkawl ṭha tawk - club pahnih goal khung a pawm loh chu offside ve ve a ni a, Mbappe penalty beisei a pek loh pawh a tidik.

Ricardo hian 2-2 a nih laiin Barca penalty a pe hman a, Raul Asencio-a'n Raphinha a tihtluk vang a ni. Mahse, minute thum zet a ennawn hnuah a thutlukna a sut a, Raphinha hi a 'dive' avangin yellow card a pe ta zawk.

Inkhelh zawhah buaina erawh a chhuak ta tho - minute 120-na velah Mbappe chu foul tiin, freekick a chawitir a, Real lamin an lungawi lohna an lantir nasa hret - bench-a awm pahnih Antonio Rüdiger leh Lucas Vázquez te chu red card pek an ni a, Jude Bellingham pawh a bang lo.