Boxing Day-ah Man United Vs Leicester

Leicester City-in zanin dar 6:00 hian Manchester United an mikhual dawn a, Boxing Day-a Premier League inkhel en tur awm zingah en châkawm ber zinga mi a ni. Team pahnih intawn hnuhnun ber chu kumin July 26 kha a ni a, Man United-in King Power Stadium-ah 2-0 a hnehna an chan avangin Champions League an khel a, Foxes erawh an chak loh avangin Europa League an khelh phah ta thung.

Tun season-ah pawh Man United leh Foxes te hian Champions League khelhna hmun an inchuh leh dawn a, chutihrualin tun ang renga an che ṭha a nih chuan nomawi hial an beisei thei ang. Brendan Rodgers hian season liam ta khan Man United hi ṭum hnih an hneh lo a, tun season-ah thlen nawn tir an tum lo ang.

Manchester United-in Leeds United an sawp hnuah inkhel thunun chungin Everton an hneh leh a, khelmual chhunga an chevel a hmuhnawm avangin Premier League champion thei zingah an sawi leh ta hial.

Norwegian manager Ole Gunnar Solskjaer chuan, "Champion chungchang kan sawi ngai lo," tiin nomawi chawi thei zinga chhiar tel a duh lo a, pressure insiam a duh lo.  Man United hian tun season league match khualmuala match ruk an khelh tawhah hnehna an chang vek a, Foxes an hneh leh theih chuan pahnihna dinhmun an luah ang.

Solskjaer chuan, "Goal chhuah hmasak a thiang tawh lo. Leicester te ang team hi goal khung hmasa turin kan duh lo lehzual. Player a neih ṭhat avangin goal kan chhuah a nih chuan thochhuah a harsa ang," tiin goal chhuah hmasak a pawi tur thu a sawi. 

Man United-in khualmuala league match vawi ruk an chaknaah hian goal an chhuah hmasa vek mah se an lehthal leh vek. Chutihrualin Champions League-a RB Leipzig an hmachhawn ṭumin goal an chhuah hmasa a, team ṭha laka goal chhuah hmasak a pawizia hrechiang tawh tur an ni.

Leicester City an chawlh hahdam laiin Manchester United-in League Cup quarterfinal an khel thung. Hemi awmzia chu Brendan Rodgers-a'n a player dam ṭha zing aṭangin a duh apiang a thlang thei tihna a ni a, Solskjaer erawhin inhliam bakah player chau leh chau lo a thliar hran a ṭul dawn.

Norwegian manager hian Harry Maguire leh Bruno Fernandes te a awltir meuh lo a, player dang erawh an hahdam theih nan a inkhelh chhawk tir thung. Everton nen hian inhliam vanga Everton hmachhawn thei lo, Scott McTominay leh Aaron Wan-Bissaka te an chhawr leh thei tawh ang.

Heng bakah hian League Cup-a bul ṭan lo Victor Lindelof, Fred, Marcus Rashford, Anthony Martial, Luke Shaw leh David de Gea te bul ṭan tura beisei an ni. Uruguayan striker Edinson Cavani-a'n Toffees nen goal pawimawh khun gmah se bench-ah a awm a rinawm thung.

Leicester City pawhin an chhuanvawr Jamie Vardy an chhawr theih a beiseiawm a, English forward hi  James Maddison leh Ashley Barnes ten an thlawp ang. Foxes hian Everton an hneh loh hnuin match hnuhnung berah Tottenham 2-0 in an hneh a, an phur vanglai takin Man United an mikhual turah a ngaih theih a ni.

1992 : Sheffield Wednesday 3 - 3 Man United 

1993 : Man United 1 - 1Blackburn 

1994 : Chelsea 2 - 3 Man United 

1996 : Nottingham Forest 0 - 4Man United 

1997 : Man United 2 - 0Everton 

1998 : Man United 3 - 0 Nottingham Forest 

1999 : Man United 4 - 0 Bradford 

2000 : Aston Villa 0 - 1 Man United 

2001 : Everton 0 - 2 Man United 

2002 : Middlesbrough 3 - 1 Man United 

2003 : Man United 3 - 2 Everton 

2004 : Man United 2 - 0 Bolton 

2005 : Man United 3 - 0 West Brom 

2006 : Man United 3 - 1 Wigan 

2007 : Sunderland 0 - 4 Man United 

2008 : Stoke 0 - 1 Man United 

2010 : Man United 2 - 0 Sunderland 

2011 : Man United 5 - 0 Wigan 

2012 : Man United 4 - 3 Newcastle 

2013 : Hull 2 - 3 Man United 

2014 : Man United 3 - 1 Newcastle 

2015 : Stoke 2 - 0 Man United 

2016 : Man United 3 - 1 Sunderland 

2017 : Man United 2 - 2 Burnley 

2018 : Man United 3 - 1 Huddersfield 

2019 : Man United 4 - 1 Newcastle