PSG an chak lo

Paris Saint Germain manager Luis Enrique-a'n tlawm miah loa Ligue 1 season hman zawh duh mah se, an tum leh duh ang vekin thil a thleng thei bik lo - Zirtawpni zan khan an mikhual Nice lakah 3-1 in an chak lo.

Ligue 1 thuneitu lamain Champions League a ngaihtuah tel a, European football inelna sang an khelh dawn chuan kar tawpah PSG an inkhelh hma tir ṭhin, tun ṭumah pawh hian Zirtawpni zanah an inlan.

Paris khawpuia inkhelah mikhual Nice tan Morgan Sanson chuan goal hnih a khung a, a goal hnih khung kar lakah PSG tan Fabian Ruiz chuan khung ve mah se, a hnuah Youssouf Ndayishimiye chuan Nice chak a nemnghet.

PSG manager Luis Enrique chuan, "Cha loh hi chu eng hunah pawh a lawmawm loh a, mahse football ken tel a nihna hi kan hriat a ngai a, hnehna chan phu khawpa khel Nice kha kan lawmpui mai tur a ni ang.

"Kan khelh dan kha chu a chhe lo, kan khelh dan leh result hi chu a inmil lo hleah ka ngai. Tunah chuan hmalam kan en a ngai zawk a, London-ah chuan match ṭha tak khel turin kan inpeih ngei ang," a ti.

PSG hian Ligue 1 nomawi an chawi fel tawh a, French Cup final an lut tawh bawk. Champions League semifinal-ah Arsenal hmachhawn turin April 29, Thawhlehni zan hian Emirates Stadium an tlawh ang.

Arab sum hmanga siam len an nih hnuah Paris club hian France rama football inelna hrang hrang an thunun hneh hle. Mahse, club neitu lamin an duh ber UCL erawh an la champion thei lo, kuminah hun ṭha an nei mek - an hmabak erawh a awlsam dawn lo; Real Madrid pet chhuaktu an hmachhawn dawn a ni.