Kane leh Bayern tan nghah a la ngai

Bayern Munich chuan Bundesliga nomawi an khawih thuak thuak tawh a, mahse nomawi kawl mektu Bayer Leverkusen kut aṭanga chhuhsak fel tur chuan match khat dang an nghah leh rih a la ngai dawn.

Inrinni zan Bundesliga inkhelah Bayern Munich chian an khingpui Mainz chu 3-0 in an sawp, an elpui Leverkusen chak zo lo se la chuan an champion nghal ang, mahse Xabi Alonso naute hian Augsburg chu 2-0 in an hneh ve thung a ni.

Allianz Arena-a inkhelah Bavarins tan hian Leroy Sane, Michael Olise leh Eric Dier ten goal khat ṭheuh an khung. Striker Harry Kane chu ṭul lo taka hun a khawhral luih avangin yellow card pek a ni a, match khat a khel thei lo ang.

Bayern Munich hian a match lehpekah chuan RB Leipzig an lenchilh dawn - Vincent Kompany enkawl team hi an chak a nih chuan a vawi 33 nan Bundesliga champion an ni chiang tawh dawn a ni.

Kompany chuan, "Match tin mai hian thawhthu a nei a, tun ṭum pawh hi Thomas Muller-a'n Bundesliga match 500 a khelh tlinna a ni a, hun hlu bik a tawng hi ka lawmpui. Tunah chuan kan tum kan hlenchhuak teuh tawh hle, inthlahdah loin kan bei zui ang," a ti.