Match hmasa berah Djokovic a tlawm

Novak Djokovic chu vawi thum a champion tawhna Madrid Open-ah a inlan a, mahse hneh nei loin a match hmasa berah a chak lo nghal. A khingpui Matteo Arnaldi lakah 6-3, 6-4 in a tlawm.

Kum 37 mi Djokovic hi seeded palina a ni a, first round a bye a vangin inkhelh hah a ngai lo. Second round-ah hian chak tura rinkai zawk ni mah se a service vawi thum ngawt hlohin a ding tlang zo ta lo.

Serbian star hian tun hma lama a boruak a phak thei ta lo, tun hnaiah a zawnin match thum a tlawm taw. A kum a tam deuh tawh a, hliam nei loa a inkhelh pawhin ṭha taka inlan a harsat tawh a ni.

Grand Slam vawi 24 champion tawh Djokovic chuan, "Monte Carlo Masters ka khelh nen khan a boruak a danglam lo, chak lo mah ila nuamti takin match ka khel thei a, kei aia khel ṭha zawk lakah ka chak lo ni maiah ka ngai.

"Madrid Open hi ka khel leh ngei ang em tih ka sawi chiang ngam lo, he hmunah hian engtik niah emaw chuan ka lo kir leh ngei dawn a, mahse player ni chungin ka lo kir dawn em tih chu ka sawi thei lo," tiin a sawi.

Kum 2023 mai kha chuan Djokovic hian season khata Grand Slam pali zinga pathum a la thei, amaherawhchu a hnu lamah chuan major title lak belh a nei tawh lo, player a nih chhunga a hun hnuhnung a hmang ve mek.

Inkhel dangah Alexander Zverev chuan winners vawi 32 vaw chhuak chungin Spainish tlangval Roberto Bautista Agut chu 6-2, 6-2 in a hneh. German tlangval hi Munich Open champion hlim a ni a, a boruak a fuh chho hle.