Lunglei an champion

Cricket Association of Mizoram (CAM) hnuaia inelna - Inter District Cricket Tournament vawi lina chu khelh zawh a ni a, Siaha khawpuia neihah Lunglei DCA chuan Serchhip DCA hnehin an champion.

Serchhip leh Lunglei te hi round match-ah pawh group pakhatah awm dunin, Lunglei DCA hian an lo hneh tawha, final-ah intum lehin an hneh nawn leh a ni.

Ṭhum vawra vannei zawk Serchhip lamin vuak hmasak thlangin over 20-ah mi 8 hlohin, run 137 an siam. Lunglei tan target 138 an tuksak. Target hi umin Lunglei chuan over 17 leh ball 4-ah mi 4 chauh hlohin awlsam takin target hi an umphak.

Lunglei opening batsman Jack Lalnunmawia chuan ball 59 a hmachhawn aṭangin run 59 (half century) siamin Man of the Match atana thlan a ni.

Tournament-ah hian a vawi khat nan 3rd umpire hman a ni a, hetah hian run out leh stumping etc te TV umpire rawn theiha siam/chhawpchhuah a ni.

Inter District Cricket Tournament hi District Cricket Association te'n an inthlenchhawk ṭhin a, a thlengtu hi an la champion ngai lo thung. Kolasib ṭum hnih champion tawhin, Serchhip leh Lunglei te vawi khat ve ve an champion tawh bawk.