Fan-te tan a ni - VVD

Liverpool captain Virgil van Dijk chuan, "Keimahni tan mai ni lo, kan fan-te, khawvel hmung hrang hranga min ṭantute tana champion hi ka châk em em reng a ni.

"He club hi khawvela club duhawm ber a ni a, champion hi kan phu a ni. Hun engemaw chen chu kan lawm ang chu," a ti - Dutch defender hi Liverpool captain, British mi ni lo, league nomawi chawi hmasa ber a ni dawn.

Reds-in 2019-20 season-a nomawi an chawi ṭuma player pawimawh lo ni tawh Andy Robertson chuan, "Kan champion hnuhnun zawk kha chuan boruak a danglam - kan champion kha a hlu takzet a, tuna kan hun tawn erawh a ropui thlawt a ni," a ti a, fans tel ngeia champion chu a dan a dang thu a sawi.

World Cup 2022-a Argentine champion puitu, midfielder Alexis Mac Allister chuan, "World Cup nomawi chawi hnua Premier League champion nih chu a hlu takzet. Ka ṭhiante vang a ni a, kei chu tha thawh ve zinga pakhat mai ka ni e," a ti a, a inngaitlawm thiam hle.

Liverpool hian May 25 zanah an league match hnuhnung ber an khel dawn a, Anfield-ah Crystal Palace mikhualin, hetah hian nomawi an chawi ang.