Mizorama basketball thiam ber club kan hre dawn ta
Sharda University Mizoram Super League X final, game 3-na chu zanin dar 8:30 hian khelh a ni dawn ta a, MSL champion ngun ber Zarkawt BCA leh Khatla TBL an intawng dawn.
Khatla TBL hian game 1-ah 78-73 in Zarkawt BCA an hneh a, game 2-ah champion mai inring chungin, veng mipui tam tak nen R. Dengṭhuama Indoor Stadium Mualpuiah an feh chhuak. Mahse, Zarkawtin game 2-naa tlawm mai an duh lo a, 83-77 in Khatla TBL an hneh let.
Zanin dar 8:30-ah game 3-na khelh a ṭul phah a, Mizorama basketball thiam ber club zaninah kan hre dawn - Khatla tan Zarkawt rorelna paihthlak chu thil châkawm a tling a, Zarkawt tan season khata Mizoram basketball-a nomawi awm zawng zawng lak vek tluka châkawm a awm kher lo ang.
Mapuia mut a tui!
Zaninah final boruak a sang dawn a, mahse, Khatla coach H. Laldinsanga (Mapuia) erawh a talbuai phah lo. Mapuia chuan, "Kan tho leh thei ang tih hi ka ring nghet bur a, muttui loh phah nan ka hmang lo," tiin Vanglaini a hrilh!
Mapuia chuan, "Game 2-ah kan chesual palh a, kan tihsualte siamṭhat kan tum ang. Veng mipui pawhin min ṭawiawm ṭha leh ang tih kan ring," a ti a, Khatla Veng mipuiten hun pawimawhah an veng an thlahthlam lo tawp ang.
Hetihrual hian Emmanuel VL Awmpuia, Vanlalṭhazuala leh Nary James te chu Khatla chakna tura player pawimawh an ni leh dawn a, chutihrual chuan player dang pawhin mawhphurhna an lak thiam a ṭul dawn.
Beiseina neitu Zarkawt
Zarkawt BCA coach Marc Lalthlamuana Sailo chuan, "Kan inbuatsaihna a ṭha a, theihtawp kan chhuah leh dawn. Game a ni a, engpawh thleng thei a ni - chutihrual chuan champion kan inring," tiin Vanglaini a hrilh a, a zawna game an lak theih a beisei.
Game 2-ah Zarkawt tan Zonunsanga chu player langsar a ni a, zaninah pawh Mizo point guard ṭha hian a theihna ang taka a khelhchhuah chuan Khatla tan a hnawksak leh dawn tih a chiang a, R. Lalnunpuia a la awm cheu bawk - game 2-a minute ruk pawh khel tling lo Marquis Cunningham pawhin khelmualah hun tam zawk hmangin mawhphurhna a la leh tawh ang.
Zarkawt BCA boss Marc chuan, "Veng mipui pawh inkhel en turin kan insawm nasa a, a tam thei ang berin min ṭawiawm leh ang tih kan ring," a ti a, veng mipui puihna nen Khatla hneh a tum - ticket chan tum tan kal hma a finthlak dawn.