LBS Suzuki CYMA Football: Zanin dar 8:00-ah a pet hawnna neih a ni dawn

LBS Suzuki 22nd Inter Branch YMA Football 2025 chu zanin hian Central YMA Hall, Tuikhuahtlangah a pet hawnna neih a ni dawn a, fixtures tlangzarh a ni nghal ang. Tun ṭum inelnaah hian branch 154 an tel a, CYMA Football awm tawha team tel tam ber dawttu a ni.

Pet hawnna neih hma hian zanin dar 7:00-ah manager's meeting neih tur a ni a, hetah hian branch tin aṭangin manager kal tura beisei an ni. Pet hawnna hi dar 8:00-a ṭan tur a nih avangin inelna buatsaihtute chuan manager-te hi ṭan hun taka thleng hman turin an hriattir.

Fixtures chu

Team 154 an awm dawn a, match 153 a awm dawn a, khelmual pali RG Stadium, 1st Bn MAP Ground, Chite Ground leh Muallungthuah te khelh a ni dawn. Inelnaah hian seeded siam a ni dawn a, kum 2023-a an chet ṭhat dan a zirin seeded hi siam a ni ang.

Branch 16 seeded an ni dawn a, kum 2023-a last 16 lutte chu Thingsulthliah, Khawzawl Vengthar, Republic Veng, Bawngkawn, ITI Veng, Durtlang, Mission Veng, Tlangnuam, Venghnuai, Darlung, Bethlehem Vengthlang, Sialhawk, Hualnghohmun, Lengpui, Salem Veng leh Thenzawl Joint te an ni.

Mahse tun ṭum inelnaah joint-a tel a rem loh vangin Thenzawl Joint hi seeded-a an awm a rem kher a rinawm lo a, Thingsulthliah pawhin entry fee an pe lo. Hei vang hian last 32 lut chin en tel a ṭul dawn. Last 32 lutte chu Ramhlun Venglai, South Sabual, Chalrang, Barabi Jt, Chanmari, Electric Veng, College Veng, Armed Veng, Lengpui Model, Sihphir, Marpara, Keifang Venglai, Lungdai leh Mualpui an ni a, anni aṭangin an thlan chhuah a rinawm.

Seeded-a awm thei tur thlirin champion tura rinkai ni phak lo an awm nual dawn a tih theih a, hei hian fixtures a tingaihnawm sawt dawn. Thleng sang tur chuan awmna group a fuh a ṭul a, branch ṭhenkhat vannei deuh an awm dawn niin a lang.

A ngaihnawm ṭan

CYMA Football hi May 6, Thawhlehnia khelh chauh tur ni mah se a ngaihnawm ṭan der tawh. Team ṭhahnem takin kum 40 tling tawh veteran player an ziak lut a, hei aia tam daih hi kum naupang player an awm. Team tinah Voter ID la nei lo ṭhahnem tak an awm zel a, Mizo football tan chanchin lawmawm a ni.

Tun inelnaah hian player bakah coach te team pakhatah bak an inziak lut thei lo a, coach leh player nihkawp tumin an duh an thlan fel a ngai. Chutihrualin coach pawh a team enkawl bikah chuan player angin a inziak lut thei thung.

Branch 154-ah Aizawl khaw chhung aiin Aizawl khaw pawn an tam zawk a, chutihrualin CYMA Football-ah Aizawl khaw pawn aṭangin Lengpui chiah an la champion. Ṭum 21 inelna neih tawhah vawi 20 chu Aizawl khaw chhung team an champion.

Inelna hnuhnung berah khan record nei ṭha ber Armed Veng pawhin last 16 an lut zo lo a, last 16 lut zingah Republic Veng leh Lengpui chiah champion tawh an awm. Quarterfinal lut chinah champion tawh pakhatmah an awm tawh lo a; a vawi khat nan Venghnuai an champion.