'Mizo Flash' a che leh ta

Indian Super Cup-ah Lallianzuala Chhangte a chet ṭhat chhunzawm zel - a tlan chak em avanga 'Mizo Flash' hminglem an vuah forward hian Pathianni zan khan Inter Kashi lakah goal a khung a, Super Cup semifinal-ah Mumbai City a hruai kai.

Lunglei tlangval LZa hian Super Cup an match hmasa berah khan Mumbai chu Chennaiyin lakah 4-0 in hnehna a lo chanpui tawh a, goal hnih a khung bakah assist a nei tel.

LZa hian tun inelnaah goal thum a khung ta tihna a ni a, NorthEast United striker Alaaeddine Ajaraie leh FC Goa attacking midfielder Iker Guarrotxena te nen goal thum ṭheuh khungin, top scorer an ni bawk.

Mumbai tan hian LZa bakah Hmingthanmawia Ralte (Valpuia) chuan inkhel bul a ṭan a, Inter Kashi lamah Edmund Lalrindika'n bul a ṭan bawk.

Pathianni zan inkhel hnuhnung zawkah NorthEast United-in ISL playoff-a an ngam loh hnu Jamshedpur an la ngam thei chuang lo a, hun pangngaiah 0-0 a an inhnehtawk hnuin, penalty-ah 5-4 in Men of Steel an chak.

Khalid Jamil-a enkawlna hnuaiah Jamshedpur hian ISL leh Super Cup semifinal an lut ve ve tihna a ni a, semifinal-ah Mumbai City nen hian an intawng ang - Super Cup semifinal hi Nilaini zanah khelh tur a ni.