Football hi eizawnna tlak a nih tawh - MFA Sr Vice President

Association of Mizoram Football Licensed Coaches (AMFLC) te chuan Inrinni khan Hotel Ransam, Ṭhuampui Vengtharah general body meeting an nei a, khuallian MFA sr. vice president PC Vanlalhruaia chuan ei zawn nan football a tlak tawh thu a sawi.

PC Vanlalhruaia chuan,"Football hi eizawnna tlak a ni tawh a, hma kan sawn zel pawh a pawimawh. Local football-a lungawi mai loin ISL leh I League club enkawl thei tura ṭan kan lak a ṭul. Licence coach a pawimawh zel a, nakin lakawh chuan MFA hnuai inelnaah licence coach chauhin team a enkawl thei tawh ang," tiin ṭan lak a ngaih thu a sawi.

Mizoram Premier League club enkawl tur hian C Licence neih a ngai a, Santosh Trophy-a Mizoram enkawl turin B Licence neih a ngai. I League team enkawl turin A Licence a ngai a, ISL enkawl turin Pro Licence a ngai thung. Football inelna ṭhang chho zelah coach-te pawhin hma a sawn zel a, MPL level tihsan nan team enkawl turin B Licence chin tihhun pawh a la awm ang.

AMFLC general body meeting chhimtu zinga mi MFA asst secretary Lalbiakzuala chuan, "Coach-ten hma kan sawn a, hmasawnna tur pawh a la tam hle. Chumi tur chuan sum leh pai a pawimawh a, MFA pawhin lawmman tih san theih dan kawng hi a dap ve reng a ni," tiin a sawi ve bawk.

AMFLC hnuaiah coach 219 an inziaklut tawh a, tun dinhmunah pro licence coach an la awm lo. Mizo zingah A Licence coach panga an awm tawh a, chungte chu Danny Lalduhawma (Ramhlun South), Lalrindika Khiangte (Mission Veng), Stephan Tawnthansanga (Muthi), Victor Lalbiakmawia (Mission Vengthlang) leh Lalruatliana Sailo (Vaivakawn) te an ni.

Football coach pun khawmnaah hian Directorate of Women & Child Development-te chuan awareness campaign an nei nghal a, deputy director Flora Lalṭanpuii chuan, "Infiamnaah hmeichhe hamṭhatna nasa zawka awm theih nan ṭan lak a ṭul a, hmeichhiate hi mipa ang thoin infiamnaah hian dinhmun ṭha an chelh thei a ni. Hemi kawngah hian coach-ten mawhphurna lian tak an nei a ni," tiin a sawi.