PVL kan nghak chhuak ta TNT leh Tuichangral inlan dawn

EverHome Pro Volleyball League 2025 chu zanin dar 8:00 aṭangin LPS Arena, Falkland-ah khelh ṭan a ni dawn, match hmasa berah Thutak Nunpuitu Team (TNT) leh Tuichangral an inhmachhawn ang.

Mizoram Volleyball Association (MVA) season kal laiah, inelna hmasa MVA Invitation Cup-ah Tuichangral hi an champion a, inelna lian PVL hmachhawn tur hian - 2024 Pro Volleyball best spiker Zomuansanga, Johan Vanneihsanga, Lalbiakmuana, setter C Zonunmawia, Vanlaltanpuia leh R. Vanlalmawia te an nei.

Tualchhung hian an team ti chak zual turin Chirag Yadav, Rajneesh Singh, Tanish Choudhar leh Sonu te hming an ziak lut bawk a, tun ṭumah hian coach tawnhriat nei ṭha David Aizampuia Fanai hoin champion an tum ngam ang.

TNT erawh Mizo hlangin an khel dawn, kum 2023 khan tualchhung player hlangin an lo champion tawh; kuminah hian mipa team zingah Mizoram pawn aṭanga player chahlut lo awmchhun an ni a, an neih sa te an ringtawk hle.

MVA Cup champion an ni thei a, an player kawl lai bakah Tuichangral aṭangin spiker Saidingpuia Sailo la lutin NorthEast Khawdungsei rawlthar Lalsaitluanga chu rinrawl atan an hmang chho bawk.

An champion ṭuma player pawimawh Vanlalṭanchhana, Sadrak Fanai leh captain Vanlalchhantluanga Sailo te an la kawl khawm a, a hmunah ṭantu an neih ṭhat ṭhin bawk avangin midang tana hmachhawn chak awm lo berte zinga mi an ni leh ang.