Inter Milan chungah Napoli

Scott McTominay-a goal hnih khung hmanhin Napoli chuan Torino chu 2-0 in an hneh a, coach ṭha Antonio Conte enkawl Naples club hian Inter Milan nek chhuakin Serie A-ah hma an hruai.

Napoli an chak lai hian Inter Milan erawh AS Roma lakah 1-0 in an chak lo thung. Match 34 an khelh tawh chinah Napoli hian point 74 an hmu a, champion lai Inter chu pahnihna niin point thumin an hniam zawk.

Manchester United midfielder hlui McTominay hian Napoli tana a season hmasa ber a hmang ṭha hle, minute sarihna lekah goal hmahruai khungin chawlhlawk hmain a goal hnihna a khung bawk a ni.

Diego Maradona Stadium-ah Conte leh a nauten point thum hmuin an hlim a, mahse Frank Anguissa, Stanislav Lobotka leh defender Alessandro Buongiorno te hliam vangin an chân thung.

Napoli manager Conte chuan, "Match khelh hmabak pali kan la nei, tunah hian a hmasa berah awmin kawng dik kan zawh. Kan tum leh tur zingah Lecce leh Parma te hi Serie A khelh chhunzawm tuma bei lai an ni.

"Genoa leh Cagliari te pawh ngaihthah an thiang lo, an hmingṭhatna tura bei lai an nih avangin hmachhawn an awlsam dawn lo. Chutihrualin, kan kuta awm a nih avangin paltlang kan tum ang," tiin a sawi.

Simone Inzaghi enkawl Inter Milan erawh AC Milan hneh loin Coppa Italia aṭangin an tla a, tunah Serie A hmahruaitu an nihna an hloh zui leh nghal. Champions League semifinal-ah Barcelona an tum dawn, nomawi pathum chawi thei dinhmuna ding kha hloh vek thei an ni ta, beiseina erawh an la nei.