Magic lakah Celtics kal fal

NBA champion lai Boston Celtics chuan an nomawi humhim tumin kawng dik an zawh zel - nimin zing playoff inkhelah Orlando Magic chu 107-98 in an hneh a, best of seven series khelh turah 3-1 in hma an hruai.

Celtics tan an thiampuipa Jayson Tatum chuan point 37 ngawt a neih bakah rebound vawi 14 a la a, free throw vawi 14 a vawm chu a lut fai vek; heng zingah hian hun tawp dawna vawi li a tihluh pawh a tel.

Quarter lina an khelh laiin Magic hian na takin an um a, 91-91 pawh a ni hman hial. Mahse, a hnu lama point 11 lut zinga 10 tehmeuh chu Celtics lam chan niin an chak tlang.

Eastern Conference lamah New York Knicks leh Indiana Pacers te chuan best of seven series khelh turah 3-1 ve vein hma an hruai a, tlang turin match khat chauh an mamawh tawh.

Pacers hian Milwaukee Bucks chu 129-103 in an hneh. Bucks hian an point guard Damian Lillard chu hliam vangin an chhawr tlang thei lo. A ke vei lam a ti na a, nimin khan a hliam hi endik niin a chawlh chen tur a la chiang lo thung. Knicks chuan Detroit Pistons lakah 94-93 in hnehna an chang ve thung a ni.

Western Conference first-round series lamah Los Angeles Lakers chu Minnesota Timberwolves lakah 113-116 in an chak lo. Lakers hi 3-1 in an hniam ta a, player ṭha Luka Doncic (38 points) leh LeBron James (27) te nei mah se an dinhmun a ṭha lo.

May 1, Ningani zing dar 7:30-ah Game 5 an khel leh dawn, Lakers tan tlang tur chuan an khelh hmabak pathumah an chak vek a ngai tawh dawn a ni.