Player 10 lakah United tan point khat

Manchester United-in Pathianni zan khan Vitality Stadium an tlawh a, mualneitu Bournemouth nen 1-1 in an inhnehtawk. Cherries-in Antoine Semenyo hmangin first half-ah hma mah se Evanilson-a'n red card a hmuh avangin hun tawp lam minute 20 player 10-in an khel. Mikhual team-in an tamna an hmang ṭangkai a, injury time-ah Rasmus Hojlund-a'n siphurh sutna goal a khung.

Ruben Amorim-a hoten league hmangin Europe inelna an khel thei tawh lo a, an relegate thei tawh lo bawk. Portuguese manager tan inkhelh hmabak zel hi inzirna tur a ni a, player 10-a khel Cherries laka point khat chauh hmuh hi result ṭha a ni lo.

English defender Luke Shaw-a'n tun season-ah a vawi khat nan bul a ṭan a, Europa League semifinal-ah pawh hmun pawimawh chang thei tur a ni ang. Chutihrualin tlarhma lam erawh an la ṭha tawk lo a, kum 17 mi Chido Obi pawh inlan mah se goal a la khung lo. Hojlund chungah pawh rinna an nghah a ṭul a, Danish striker hian tun season Premier League-ah goal li chauh a khung.