Silly Point: Rawltharte khawvel

He kan chenna leilung inher danglam nasa takah hian, ṭhalaite khawvelah kan cheng mek tih hi zir mite leh mi thiam zawkten an sawi kan hre fo a. Tun hnai IPL boruak kan thlir erawh hi chuan ṭhalaite khawvel mai a ni tawh lo, rawltharte khawvelah kei suihlungmawl hian ka lo puang ve tawp mai a ni.

Khawvel a naupang telh telh

University of California-a zir mite leh mi thiam zawkte chuan, professional sports-ah hian a kum telin infiammite hi an professional ṭan kum hi a naupang telh telh tih an hmuhchhuah a ni.

A chhan bulpui bera an hmuhchhuahte chu kum naupang taka training (development) vang te, infiamna khawvelin sum a kentel ṭhat hnem avang te, training leh coaching dan (method) changkang zel leh sports science & psychology hmasawn vang te, a tih theih awm e.

Chuta a khaikhawmna chu training technique changkang leh ṭha zawk leh technology ṭha zawk belhbawm chuan infiammi tha zawk a chher chhuak tihna a ni.

I naupanna tuman ngainep suh se

Martina Hingis-i'n kum 14-a Grand Slam a khelh khan khawvel mak tih a ni a. Kum 16 la pumhlum loin Pele kha Santos tan a inlan tawh bawk. Ice Hockey mi hrang Wayne Gretzky-a kha kum 19 a nih khan ice hockey khel zingah ropui bera chhal a ni ṭan der tawh.

Lamine Yamal leh Sachin Tendulkar te kum 17 mi lek an nih lai a, an rualpuiten nu leh pate pocket money an la dil laiin, cheng vaibelchhe tam tak an infiamna hmangin an thawkchhuak tawh a ni.

Bihar naupang kawlhrawng

Kum liam ta mai khan Rahul Dravid chuan kum 13 mi Vaibhav Suryavanshi chu naupang a tih em avangin Under 19 level pawh khelh a la phalsak lo. Dravid hi player ropui a nih bakah hetih hunlai hian India team head coach leh under 19 coach kum engmaw zat lo ṭang tawh a ni.

Mahse, khuanu rorelna chu tu ma dan theih mah ni hek suh. Dravid hi tunah chuan Rajasthan Royals head coach a ni a, a team kaihhruaiah ngei Vaibhav theihna a rawn inlar chhuak. Kum 14 mi Suryavanshi hian IPL-ah century a siam der tawh.

Aw! ka sawi thiam lo, aw ka hril thiam lo

IPL hi kum 2008-a ṭan a nih hnua piang, IPL-a inkhel hmasa ber Vaibhav-a chu khawvelin April 19 zan khan a hmelhriat ṭan a, a pate rual tur bowler te an hlap tak tak a nih kha. Khawvel hmuha a rawn inpholan dan pawh hi a Bollywood ve hrim hrim a, a ball hmachhawn hmasak berah 6 runs a vaw nghal.

IPL-a ṭum thum inlanna lekah record book-a thil awm thei zawng zawng chu an rawn siam thar ta emaw tih mai tur a ni ta. Kum 14 leh ni 32 leka upa Vaibhav Suryavanshi chu IPL century vaw chhuak thei naupang ber, vaw chhuak rang her pahnihna a ni a, Indian batsman zinga vaw chhuak rang ber a ni.

Heng a record siamte hi chhui zui vak ka tum lem lo. Mahse he kum 14 rawltharin kha inkhel a awpbeh dan leh an tumpui Gujarat Titans ball vawm thiam tawnhriat ngah rual a tihrilhhai lutuk mai kha a ropui lai chu a ni. Khatiang ang batting standard class sang lutuk mai, bat laia ball vaw fuh chat chat leh ball vuakna tur (shot selection) puitling kum 14 mi leka kan hmu kha, cricket inkhelh lam ka lo chawlhsan (retire) tawh pawh hi ka tisual tawp lo e tih ka nemnghet e.

BCCI leh CAM te duhsaknain cricket zirtirna leh coaching certificate hautak zet mai Level 2 kan han bei ve a, chuta mithiam rual leh tawnhriat ngah tena rawlthar batsman a, an pianpui talent tehna ṭha ber an sawi chu - ball a khel tlai em? Hun a ngah hmel em? tih hi a ni. He kum 14 rawltharah hian ka hmu chiang ngei mai.

Ni angin an êng ang

Sanskrit ṭawng chuan Sooryavanshi chu - Ni (sun) thlah tihna a ni a. Police film lar tak Sooryavanshi-ah hian a changtupa tur atan Akshay Kumar hmang tawh loin, Vaibhav hi Bollywood film siamtute an dawr ta nih pawn thil mak a ni kher lo ang.

He Surya ( Ni) , Vanshi (Thlah) rawlthar hi, ni angin a êng zel hrih dawn a nih hi maw.