Mizoramah badminton zirna 24 awm

Mizoram Badminton Association (MBA) chuan Mizoram hmun hrang hranga badminton grassroot centre-a inzir mek, naupangte hak tur jersey tlangzarhna an nei a, he hunah hian MBA secretary general Dr K. Vanlaldinpuia chuan report pein, Mizoramah Badminton Grassroot Centre 24 a awm thu a sawi.

Report-a a lan danin badminton zir mek Mizo naupang inziak lut hi an vaiin 1047 an ni a, mipa 657-in badminton zir mekin, hmeichhia 390 an awm bawk. Hei chauh hi ni loin badminton elite centre chu Champhai leh Kolasib-ah neih niin, kum 2024 aṭanga hawn ṭan elite centre-ah te hian naupang 27 an awm mek a, mipa 14 niin, hmeichhia 13 an awm bawk.

Mizorama badminton grassroot centre-te hi TATA Trusts, NEIDA leh MBA ṭangkawpin an din an ni a, badminton zirna mumal taka kalpui a nih hnuah Mizoram badminton-in hma a sawn hle - grassroot centre jersey hi LBS Suzuki-in an sponsor a ni a, Mizoram Badminton Centre Conference Hall, Zuangtuiah MBA president Dr. Lallianzuala Hnamte chuan a tlangzarh a, grassroot centre coach-te hnenah jersey hi hlan nghal a ni.