Leeds United tan champion a hnai

Season thara Premier League khel tur Leeds United tan Championship nomawi chawi a hnai ta hle - Thawhṭanni zan khan Leeds hian 4-0 in Bristol City an sawp a, table chung ber an luah chhunzawm.

Elland Road-a inkhelah Leeds tan Ao Tanaka chuan first half-ah goal hmahruai khungin Wilfried Gnonto chuan second half-ah a belhchhah a, Largie Ramazani chuan minute 80 hnu lamah goal hnih khung ve lehin, Leeds an chak chiang.

Hetihrual hian Leeds elpui ber Burnley chuan Inrinni zan khan Queens Park Rangers chu 5-0 in an lo sawp tawh a, Championship nomawi chawitu chu fixture tawp ni, May 3, Inrinni zanah kan hre dawn chauh.

Champion Leeds?

English second division aṭang hian Leeds leh Burnley chu season thara Premier League khel turin an inpetkai tawh a, club pahnih hian match 45 khelh tawhah point 97 ve ve an nei - goal difference-ah Leeds an ṭhat zawk avangin hma an hruai.

Match khat chiah khelh tur a awm tawh a, club pahnihin hnehna an chang ve ve a nih pawhin, Burnley tana goal difference-a tluk rual tawh loh Leeds United hi an champion ang.

Hetihrual hian Leeds tan champion lena len a la thiang bik lo a, match tawp ber an khelhna tur hi khualmual niin, tla thei dinhmuna ding Plymouth Argyle an hmachhawn dawn - Burnley-in playoff beiseitu Millwall an mikhual dawn thung.

Farke hmangaihna!

Daniel Farke-a'n Premier League khel turin Leeds a hruai kir a, mahse, Leeds hi promotion a hmuhpui tih a chian aṭanga darkar 48 velah chuan Leeds hian an coach hi ban an tum tih sawi thawm a awm.

Kum 48 mi coach hian Championship aṭangin EPL-ah a club enkawl vawi thum a kaipuina a ni a, mahse, top flight league-ah a chet ṭhat chhunzawm ṭhin loh avangin Leeds thuneitu lamin ban an tum thu sawi a awm hi a awm lo hran lo.

Farke hian Leeds hmain Norwich chu EPL-ah vawi hnih a hruai kai a, a season hmasa berah relegate pui nghalin, a vawi hnih kaipuinaah hian November-ah an ban zui. Mahse, Leeds ṭantuten Bristol nena an inkhelah Farke lam an ṭang tih an lantir a, a hming lamin an au rual dual dual a, inkhelh zawha 'promotion' lawm tura khelmual an luh pawhin lawm a hlawh hle.

Playoff khel tur

Championship-ah pakhatna leh pahnihnain automatic-in EPL an khel ṭhin a, pathumna aṭanga paruknaten playoff an khel thung - tun dinhmunah Sheffield United leh Sunderland chu playoff khel tura tling chiang tawh an ni.

Hetihlai hian Bristol City, Coventry City, Millwall, Blackburn Rovers leh Middlesbrough te chu playoff khelh la beisei vek an ni - club pangain hmun ruak pahnih an la beisei tihna a ni a, match tawp ber thlengin Championship a 'hot' dawn.

Frank Lampard enkawl Coventry hian Michael Carrick enkawl Boro an hmachhawn dawn a, manager langsar pahnih an nih bakah playoff khelh la beisei ve ve an nih avangin a hmuhnawm ang.