Sane-a'n Saudi a hnar

Saudi Pro League club Al Ittihad chuan Bayern Munich-a contract hmang zo tur Leroy Sane rim mah se, German forward hian a hnar niin Sky Sports chuan a tarlang - Saudi club hian kum li chhunga euro maktaduai 100 hlawhtir an inhuam!

Mahse, Sane hian Bayern-ah a hlawh tihniama cham a thlang zawk niin an sawi a, German club ṭhaah contract thar a ziak ngei dawn niin a lang.

Kum 29 mi Sane hian Bayern-ah hian kum khatah €20mtd a hlawh mek a, a contract tharah chuan kum khatah €10mtd hlawhin, a chet ṭhat dan a zirin €15mtd thleng a hlawh thei ang.

Liverpool leh Arsenal pawhin an thlithlai nia sawi Sane hian tun season-ah Bayern tan match 42 khela goal 12 khungin, assist vawi nga a nei a, Allianz Arena-ah kum 2028 thleng cham tura contract ziak turin a inbuatsaih mek.