Rashford a inhliam na

Aston Villa-in Inrinni zan khan FA Cup semifinal-ah Crystal Palace an hneh lo a, Marcus Rashford a inhliam. Manchester United aṭanga loan hmanga Villa pantu Rashford hi a malpuiah hliam a tuar a, tun season chhung inlan tawh lo thei dinhmunah a ding.

Kum 27 mi Rashford hi Villa tan che ṭha mah se a inhliam miau avangin Premier League tawp hmain Man United-a kir leh thei dinhmunah a ding. Chutihrualin June thlaa England-in World Cup qualifier an khelh tur atana inbuatsaihnaah a hmang thei bawk.

Season tawp hmain lo dam hman reng pawh ni se, Villa hian an match hnuhnung berah Man United an hmachhawn dawn avangin Rashford hi a khel thei lo. Tun season-a inlan hman tur chuan May 18-a Tottenham Hotspur an hmachhawn hmain dam hman a ngai dawn.

Rashford hmalam hun tur hi a la chiang lo a, chutihrualin Ruben Amorim-a hnuaia khelh erawh a har deuh a rinawm. English forward hian Inrinnia Chris Eubank Jr leh Conor Benn te Tottenham Hostpur Stadium-a an inhnek ṭumin a hmunah a en a, khelmual pawna a chet dan hi Portuguese manager nen an inmil lohna lai a ni.

Man United-ah Rashford hian kum 2028 thleng contract a nei a, mah se amah ngei pawh hian Amorim-a hnuaiah khelh a inbeisei tawh lo. Chutihrualin Villa tana a chet ṭhat avangin Euro 2024 squad-ah tel pha lo mah se England tana khel tur pawhin Thomas Tuchel-a'n a ko let leh tawh thung.