Zaninah Khawbel Vs Hunthar

Everhome Pro Volleyball League 2025 chu zanin hian LPS Arena, Falkland-ah khelh chhunzawm a ni dawn. Zanin dar 8:00-ah volleyball thiam khua Khawbel leh volleyball thiam veng Hunthar te an inkhel ang.

Khawbel hian volleyball-ah sulhnu nei ṭha tawh mah se, club inelna sang ber Pro Volleyball League erawh an vawi khat khelhna tur a ni. Coach Vanlalmawia chuan, "Mizo player an neihte tan inelna a hautak dawn a, state pawn aṭanga player awmze nei tham pakhat an neih belh chuan champion tumin an khel thei ang," tiin a sawi a, an mamawh tak Ashwal Rai an la lut.

Ashwal Rai hi 6ft 7in a sang a nia, net bula lehlam vuak dan kawngah India rama hriat hlawh leh dah san a ni phak. India aiawhin Asian Championship leh World Cup a khel tawh a, Prime Volleyball League-ah Kolkata Thunderbolt player ni lai a ni bawk.

Hunthar erawh Pro Volleyball team-a hlawhtling ber an ni a, vawi khat aia tam champion thei awmchhun an la ni. May 2024 khan a vawi thum nan champion mah se club chhungah harsatna an tawh avangin Pro Volleyball-ah an khel zui thei ta lo.

Kumin inelna hmachhawn turin playoff hmangin an rawn kir leh a, nikum lama champion puitu Delhi spiker Anirag Rawat an la lut. Coach VL Malsawma Renthlei chuan, "State pawn player bakah Mizo player pathum kan lak belh avangin champion kan tum ngam a ni," tiin a sawi.

2024 champion team zinga langsar spiker Fabian Lallunghnema leh setter Remsangzuala an hmang thei tawh dawn lo a, veteran setter Ramtharnghaka la lutin Laldampuia, Lalramhluna, Ramgaihsanga te hoin Anurag an thawhpui a ngai dawn a ni.