Arsenal-in Chelsea an hneh

Sawiselna kara leng mek Mikel Arteta enkawl Arsenal chuan an mikhual Chelsea 3-1 in an hneh. London Derby a hnehna an chan avangin manager Arteta chunga boruak rit lutuk pawh ziaawm deuh tura ngaih a ni.

Premier League match sarih chhung Gunners-in chak ni hmel an hmu lo a, rinkai ni lo zawk chungin mikhual thleng mah se a tir aṭanga a tawp thlengin an chungnung zawk.

Arsenal tan Alexandre Lacazette cuan penalty chhuih lutin goalkeeper Edouard Mendy a bum a, midfielder Granit Xhaka chuan freekick chhuih lut bawkin chawlhlawk laiin 2-0 in hma an hruai.

Bukayo Saka chuan Gunners goal thumna khung belhin a team chu dinhmun ṭha takah a dah. Hun tawp dawn lamah Tammy Abraham chuan goal khat a sut ṭhen, Jorginho-a'n kung belh theihna hun nei mah se a penalty pet chu Bernd Leno-a'n a lo dansak.

Arteta-a'n Arsenal a enkawl ṭan aṭanga kum khatna a ni a, a club hian 1982 hnuah Krismas laia an dinhmun hniam lai ber - 15-na an nih avangin rinkai an ni lo, pound makatduai 200 chuang hmangtu Chelsea buk a rit zawk.

Mahse, Gunners tan bul ṭantu zingah Everton hneh lotu player aṭangin player panga siksawi an ni. Rawlthar Saka bakah Gabriel Martinelli leh Emile Smith Rowe te chu a thlun phelh ang zar zar an ni a, goal nawr kawngah an thawh hlawk hle.

Defender khel ṭha tak Kieran Tierney-a'n goal venhim lama a thawh hlawk bakah penalty a hlawh chhuak a, midfielder Mohamed Elneny-a'n an goal lina khung theihna hun nei mah se goal bar a tih per, lut ni sela chuan Chelsea an mualpho zual khawp ang.

West Brom managre thar Sam Allardyce-a'n Arsenal chu tla thei zinga mi an nih thu a sawi a, mahse Frank Lampard erawhin team ṭha tak an nih thu a sawi thung - Lampard hian a tu sawi dik zia chu khelmual chhungah a hmu chiang viau.

Chelsea tlarhma an hriam tawk lo a, duhsak hlawh Mason Mount-a'n hun ṭha a bawhpelh bakah beiseina sang tak nena lakluh Timo Werner a 'nil' zel. German striker hian inelna hrang hrangah tun hnaia a match 10 chhungin goal a khung lo.

Goal an mamawh laiin Olivier Giroud chu bench lamah dah tluan a ni. Blues lamin Ben Chilwell leh Reece James hmangin ball an cross hnem a, striker palian Giroud dah luh ni se kawngro a su zawk mai thei.

Arsenal manager Arteta chuan, "Chawlhkar riat chhung zet chu result ṭha kan nei thei lo, tuna hnehna chan hi kan tan a pawimawh hle. Hamrik hmasa ber a rik aṭang khan ka naute khan chak duhna thinlung an nei tih a lang," a ti.

Chelsea manager Lampard chuan, "Inkhel chawhnu lamah kan insiamṭha thei chauh a, a tlai tawh a ni. Kan ṭhat dan ber hian kan la khel chhuak thei lo, chutih rualin kan khingpui kha an vannei ve bawk," tiin a sawi.

Blues hian zanin dar 11:00-ah Aston Villa an mikhual zui leh dawn. Beiseina nei thar Gunners-in Thawhlehni zan dar 11:30-ah anmahni ang bawka talbuai Brighton an len chilh zui ve leh thung ang.

*Arsenal hian December 26 a Premier League an khelh hnuhnung 10-ah hnehna an chang vek, anni aia record nei ṭha chu Manchester United (12 wins) chauh niin, 1997-2016 chhung khan an chak.

*Gunners hian October thla khan Emirates Stadium-ah Sheffield United chu 2-1 in an hneh a, chumi hnuah an muala league match an khelh hoah an chak lehna hmasa ber a ni.

*Chelsea-in khualmuala league match an khelh hnuhnung pathumah an chak lo, 2019 February thla hnua an chak loh zawn rei ṭum an tawng.

*Jorginho-a'n Chelsea tana a penalty pet hmasak pariat a khung vek. Tun hnaiah erawh a pet hnuhnung paruk zinga pathum ngawt a hlah. Arsenal hma khan Liverpool leh Krasnodar lakah a khung lo.