Nakkumah ropui zawkin Olympic kan nei ang - Osaka
Japanese tennis player Naomi Osaka chuan Tokyo Olympic 2020 chu a hun sawn mah se, nakkumah kumin aia ropui zawka neih theih a beisei thu a sawi chhuak.
US Open 2018 leh Australian Open 2019 champion hi Tokyo Olympic-ah chuan Japan tana medal dawn beiseina leh 'poster girl' tur a ni a, motto an tlangzarh ṭum pawhin hmun pawimawh a chang.
Osaka hian a pianna ramah ropui taka inlan a tum, mahse coronavirus vangin kumin nipui laia neih tur Olympic chu nakkum atan sawn a ni a, kum khat dang a nghah leh rih a ngai dawn tihna a ni.
World number 10 Osaka chuan, "Kan ramah ngei mai duhsakna sang tak chang chunga Olympic khelh chu eng tiang taka hlu nge a nih ka sawi thiam lo, mi tam tak pawhin min hriatthiam pui lo zawk hial ang.
"Inelna neih hun ka nghakhlel a, sawn a ngai hi pawi ka ti hle. Mahse, kan zavaia ṭhat tlanna tur a nih zawk avangin prime minister Shinzo Abe leh IOC thutlukna hi 100%-in ka thlawp," tiin a sawi.
Osaka hi Japan rama piang a ni a, a pa chu Haitian mi a ni. A naupan laiin United States-ah an pem a, ram hranah sei lian mah se a pianna Japan tan a inlan.
Kum 22 mi Osaka chuan, "Tun hi khawvel ram hrang hrangin inlungrual taka nunna kan chhanhim theih hun lai a ni a, midang ṭanpui leh thuawihna hi Olympic thu ken zinga mi tho a ni.
"A bik takin Japan rama awmte mahni in luma tawm turin ka duh, awmhmun ṭheuhah thuawih taka kan awm kha kan him tlanna tur a ni. Kuminah Olympic nei thei lo mah ila nakkumah ropui zawka neih theih beisei ila. Chumi theng thei tur chuan him takin lo awm ṭheuh rawh u," a ti.
Asian tennis player zingah Osaka hi world number 1 ni thei hmasa ber a ni a, a kum a la tam loh avangin hmabak nei eng tak a ni bawk.
Tun dinhmunah Japan ramah coronavirus kai mi 1,400 an chuang tawh a, mi 47 an thi tawh.