Utah Jazz team dinhmun a tha
Basketball player langsar Rudy Gobert leh Donovan Mitchell te awmna Utah Jazz team leh club tana hna thawktute dinhmun chu a ṭha. Utah Jazz hi an player zingah Covid-19 kai an awm avanga khung hran kha an ni.
March thlatir khan Utah leh Oklahoma City Thunder te hi NBA regular season kal laia inkhel tur an ni. Mahse, Utah player zingah coronavirus kai an awm a, inkhel tur hi ṭhulh niin NBA pawh chawlh lailawk nghal a ni bawk.
All-Star zinga mi Gobert leh Mitchell te chu hri kai zingah an tel tih hriat a ni a, hei vang hian anni pahnih bakah team player zawng zawng leh hnathawktute chu ni 14 chhung midang lak aṭanga dah hran an ni.
Tunah chuan ni 14 an inkhung hranna hi a zo tawh. Utah Department of Health chuan an dinhmun a ṭhat thu an sawi. Jazz chuan, "In khung hran hun chu a zo ta, Donovan Mitchell leh Rudy Gobert te bakah midang dinhmun a ṭha, hri hi an inkaidarh lo bawk.
"Jazz player-te hi anmahni ina an haw hnuah pawh fimkhur tura tih an ni a, pawimawh leh ṭul bik thilah lo chuan an chhuak rih lo ang," tiin an sawi.
Kar hmasa khan hri kai zinga mi Gobert chuan Jazz tan a nghet loa hna thawktute hlawh atan $500,000 aia tam a lo pe tawh. Gobert chuan, "Thil rim leh a tuina ka hre lo kha a hrehawm," tiin Covid-19 vanga a damloh lai a sawi.