Juve player ten hlawh la kim dawn lo
Juventus player leh an manager Maurizio Sarri te chuan thla li chhung an hlawh lak kim loh an remti a, hlawh an lak kim loh aṭangin an club khelhna hi pound maktaduai 80.7 laiin an ṭanpui let thei dawn a ni.
Covid-19 vangin Italy an buai a, an ramah hian April 3 thleng chu infiamna lam reng reng neih a ni rih dawn lo. Serie A pawh an chawl lailawk mek, engtik hunah nge an ṭan leh theih ang tih pawh a la chiang lo.
Portugal forward Cristiano Ronaldo leh Arsenal midfielder hlui Aaron Ramsey te awmna Turin club player leh manager hian March, April, May leh June thla hlawh chu a kim loin an la ang.
Italian champion chuan thuchhuah siamin, "Club hmangaihtu player leh manager ten hlawh lak kim loh an rel a, season kal laia hri leng vanga harstana kan tawh sut kian nana tih a ni," an ti.
Turin-a innghat Juve hi coronavirus vanga buai zinga mi an ni, an player zingah forward Paulo Dybala, defender Daniele Rugani leh midfielder Blaise Matuidi te chu hri hian a man; tunah erawh an dinhmun a ṭha vek tawh.
Juve chuan sawi zawmin, "Serie A hi kan khelh zawm leh thei a nih chuan theihtawp kan chhuah zui ang. Club chuan player leh coaching staff chungah rinna a nghat ngam a, tuna hlawh chungchanga an thil tih vang pawh hian club a lawm takzet," an ti.
Hri leng mek hian nasa takin football a nghawng a, European club lian leh player langsar tak takte chu midang ṭanpui tura an chet chuah tawh bakah, an hlawh la kim lo turin thutlukna an lo siam nual tawh hlawm bawk.