BCCI-in vaibelchhe 51 a thawh
India rama cricket thuneitu sang ber Board of Control for Cricket in India (BCCI) chu Covid-19 do nan a che chhuak ta. BCCI hian Inrinni khan cheng vaibelchhe 51 chu hri leng do nan an thawh thu an puang.
BCCI pawisa thawh hi Prime Minister Citizen Assistance leh Relief in Emergency Situations Fund (PM-CARES Fund)-ah a lut dawn a, ram puma Covid-19 do nan hman tur a ni.
BCCI chuan thuchhuah siamin, "President Sourav Ganguly, honarary secretary Jay Shah bakah Board of Control for Cricket in India (BCCI) OB-te, state hrang hranga hruaitute chuan hri leng do nana cheng vaibelchhe 51 thawh hi kan remti.
"BCCI leh state lama thuneitute chuan sorkar laipuiin sum a hman dan hi ngun takin a vil zui ang. Tun hi mite ṭanpui hun a ni a, he natna hi kan hneh ngei theih nan theihtawp kan chhuah zel ang," an ti.
India cricket legend Sachin Tendulkar chuan Covid-19 do nan hian cheng nuai 50 a lo tawh tawh a, tun hnai mai khan cricketer dang Suresh Raina pawhin PM-CARES Fund tana nuai 31 leh UP CM Disaster Relief Fund atan nuai 21 a lo thawh tawh bawk.
Indian infiammi langsar, badminton world champion lai PV Sindhu leh BCCI president Sourav Ganguly te bakah wrestler Bajrang Punia te pawh hri leng mek do tur hian an lo che chhuak tawh a ni.