British GP dinhmun a chiang lo
Coronavirus vangin Wimbledon kal dan tur ngaihtuah a ni dawn a, tennis inelna lian dinhmun a chian loh rual chiah hian Britain rama car intlansiakna lian British Grand Prix pawh a dinhmun a chiang lo zui bawk.
July thla hian Wimbledon khelh a ni ṭhin a, inelna a neih zawh chawlh kar khatna tawpah British GP hi tlan ṭhin a ni. Kuminah erawh ruahman lawk angin thil a kal thei rih lo a ni.
Motorsport thuneitu lam chuan season calendar an hman dan tur siamṭhat an tum thu an sawi tawh a, intlansiak 21 awm tur pawh 15 vel lekah pawh tlahniam thei a ni. March thlatir a neih ṭan tur F1 season hi an ṭan hun tur pawh sawi chian theih a ni rih lo.
British GP an tlanna hmun Silverstone managing director Stuart Pringle chuan, "Keimahni thutlukna chauh a ni thei tawh rih lo. Formula 1 nena inremna fel tak siam hmasa lo chuan thil kalpui kan tum lo ang.
"Eng pawh thleng thei a ni a, chutih rual chuan inelna kan nei dawn a nih chuan intlansiak neih hma chawlh kar 12 a la awm talah a chian a ngai, inbuatsaihna tur tam tak a awm thei a ni," a ti.