FC Goa-ah Edu Bedia a cham chhunzawm dawn
Spanish midfielder Edu Bedia chuan Indian Super League khelh chhunzawm zel a tum a, season thara AFC Champions League khel tur FC Goa tan contract thar a ziak.
Kum 31 mi midfielder hian kum 2017 khan FC Goa hi a zawm a, Gaurs (Goa sawina) a zawm hnuah khaw dang hawi loin Indian club tan hian a la khel char char a ni.
Racing Santander tana La Liga-a season li ngawt lo khel tawh Edu hian season hmasa khan league match 13 khelin goal khat a khung a, assist vawi hnih a nei.
Barcelona B team player hlui hian hliam vang leh Hugo Boumous khelh ṭhat vangin hmun a chang tam tawk loah a ngaih theih a, mahse khaw dang hawi loa Goa tana khelh chhunzawm a thlang a ni.
Kum 24 mi Hugo Boumous hian FC Goa-ah hian season hnih dang cham turin contract a la nei a, club tam tak chil a tih put avangin a hma hun tur sawi thiam a harsa hle.