Pedro-an league ṭan hmaa pre-season neih a duh
Chelsea forward Pedro chuan Premier League chawlh lailawk chu khelh chhunzawm leh a nih hmaa pre-season neih ṭha a tih thu a sawi a, "Tuna kan awm dan anga khelh leh ngawt chu a harsa dawn a ni," a ti.
Covid-19 hri leng vangin Premier League chu April 30 thleng chawlh lailawk a ni a, mahse hei aia rei zawk pawh hi chawlh a ngaih a rinawm - April 3-ah Premier League club-te hi an inhmukhawm leh dawn a ni.
Pedro chuan, "Inah rim takin training chu a neih reng theih a, mahse a hmaa kan hnathawh ṭhin dan nena khaikhin a ralah chuan a nep hle. Rei tak awm ho loin club-te pawh an awm tawh a, thawk leh khata in 'fit' lehnghal chu a harsa dawn a ni.
"Ka ngaihtuahnaah chuan pre-season hi rei lote nei ila, tichuan match hmabak kan la neih te pawh awlsam zawkin kan zawh theih ka ring," a ti.
Kum 2015-a Barcelona aṭanga Chelsea pantu Pedro hi London khawpuiah lockdown vangin a awm mek a, a chhungte erawh Spain lamah an awm thung.
Pedro chuan, "Ka chhungte zawng zawng Spain lamah an awm vek a, a khawhar thlak duh khawp mai," tiin a sawi a, phone hmanga an inbiak reng thu a sawi.
Kum 32 mi Pedro hian Chelsea-ah May thla thleng daih chauh contract a nei tawh a, a awm zel dan tur a la hriat loh thu a sawi. Spanish forward chuan, "Chelsea ta ka ni a, he hmuna cham hi ka duh. Mahse, eng thil nge lo thleng dawn erawh sawi theih a ni lo," a ti.
Premier League-ah hian club tam zawkin league match kua chiah khelh tur an nei tawh a, table chung berah Liverpool awmin an hnuai chiahah Manchester City an awm.
City aia match khata khel tam chungin Liverpool hi point 25-in an sang fal mek a, champion turin match hnih chak chiah an mamawh tawh.