Manchester United-in India kal ṭhulh mai thei
Premier League club Manchester United chu a vawi khat nana India leilunga inkhel tur anga sawi thawm ri ring hman viau mah se coronavirus vangin an kal theih a rinawm ta lo a, pre-season tour neih tur ṭhenkhat an cancel vanga sum an hloh tur ringawt hi pound maktaduai 16 a tling.
Manchester United hian Kolkata club hlun East Bengal nen inbiakna an kalpui a, Lalrindika Ralte captain-na hnuaia khel club hian an club kum 100 tlin lawmna pualin United hi Kolkata khawpuia friendly match khelhpui an tum.
Mahse, coronavirus hri lengin infiamna khawvelah nghawng na tak a neih takah chuan Kolkata khawpuia inkhel pawh hi ṭhulh mai a ngaih hmel ta a, thuchiang tak erawh a la awm lo.
Khawthlang media ten an tarlan dan chuan United hian pre-season match khat khelh manah pound maktaduai 3.25 an inchhiar a, senso dang nena ngaihtuah chuan match khat khelh nana an fee hi pound maktaduai li a tling.
Red Devils hian ruahmansa ang chuan July thla tawp leh August thlatir lamah pre-season match nga khelh an tum a, contract engmah ziah fel a la awm lo thung.
United thupuangtu chuan, "Engtikah nge league kan khelh leh theih dawn a hriat loh a, contract ziah chi a la ni rih lo. Thil awm dan tur chiang phawt se, chumi hma chu thutlukna kan siam lo ang," a ti.
Nikuma season ṭan dawn khan United hian Australia, Singapore, China, Norway leh Wales-ah te pre-season an hmang a ni.