Wales chelhtu Austria

Austria manager Marcel Koller-a'n Wales-in Euro 2016 semifinal an luh chhan chu an vanneih vang a nih thu a sawi a, Wales manager Chris Coleman-a'n team
ṭhenkhatin group stage an paltlang zawh loh chhan chu boruak sang an la tawn loh vang a nih thu sawiin Austria a kap zui.

Inkhelh hmaa mana-ger pahnih inkahna avangin boruak a sang a, mikhual khelmuala goal khung hmasatu erawh Wales an ni. Stoke City midfielder Joe Allen chuan minute 28-naah half-volley hmangin Wales hmahruaina goal a khung a, minute ruk a liam hman chauh tihin Stoke-a Allen-a khelhpui Marko Arnautovic chuan an si phurh sutna goal a khung.

First half injury time-ah Gareth Bale-a long throw aṭanga ball kal chu Kevin Wimmer-a'n an lamah a ti lut a, chawlhlawk hman a nih meuh chuan Wales-in 2-1 in hma an hruai. Mahse, second half
ṭan aṭanga minute thum hnu lawkah Arnautovic a inlar leh a, kum 27-a upa forward hian Austria tan a vawi hnih nan an si phurh sutna goal khungin team pahnih hi 2-2 in an inhnehtawk ta a ni.

Wales manager Chris Coleman chuan, "Dik taka sawi chuan Austria khelmuala point khat hlawh chhuah hi lunghnurna tur a ni lo. Point thum tal hlawh chhuak tur chuan kil tinah a ṭha thei ang bera kan khelh a ngai a, mah se chutiang chuan kan khel si lo a ni. Mahse, kan khelh chhiat zanah pawh point hlawhchhuah dan kan hria a, a hunah tak kan vanneihna kan hmang ṭangkai a ni," tiin point khat hlawhchhuah chu lawm lohna tur a nih loh thu a sawi.

Group D inkhel dang-ah Republic of Ireland chuan Seamus Coleman goal khat khung hmangin Georgia chu 1-0 in an hneh a, Serbia-in khualmualah Moldova chu Hamburger forward Filip Kostic, Chelsea defender Bra-ni-slav Ivanovic leh Sou-thampton midfielder Dusan Tadic goal khung hmangin 3-0 in an sawp bawk.