Goal khung thiam Croatia

FIFA hnuaia an khel-muala compe-titive match hmasa berah Kosovo-in Croatia an hmachhawn nghal a, an ram chanchina chuang reng tawh tur inkhelah an mualpho - mikhual team Croatia hian 6-0 in hnehna an chang.

Kosovo hian World Cup qualifier thleng zo khawp khelmual an neih loh avangin Albania-ah Croatia hi an mikhual a, Juventus striker Mario Mandzukic chuan first half-ah hattrick a siam der. Chawlhlawk hman a nih hnuah pawh Croatia tho an chungnung a, Matej Mitrovic, Ivan Perisic leh Nikola Kalinic ten goal khat ṭheuh khung ve lehin Kosovo tan thawh leh ngaihna a awm tawh lo.

Football khawvela thuneitu sang ber FIFA leh Europe-a football thuneitu UEFA chuan May thla khan Kosovo hi an member-ah an pawm ve chauh a, September khan an competitive match hmasa berah Finland chu 1-1 in an lo inhnehtawkpui tawh a ni.

Group I inkhel dangah Iceland-in Finland laka 2-1 a an tlawm reng hnuah comeback ropui an lantir a, 3-2 in hnehna an chang. Finland hian Teemu Pukki hmanga goal hmahruai an khung hnuah Iceland tan Kari Arnason chuan an si phurh a sut a, Robin Lod-a'n Finland hmahruaina goal a khung nawn.

Swansea City midfielder Gylfi Sigurdsson-a'n penalty a pet goal loh hnuah Iceland an vanduai tlang dawn niin a lang hman a, mah se Alfred Finnbogason chuan minute 90-naah an si phurh a sut! Iceland-in an la duhtawk lo cheu, injury time-ah Ragnar Sigurdsson chuan goal khat dang khung ve lehin 3-2 in a chak zawkah an ṭang ta a ni.