Chennai ngam loh Delhi

Indian Super League champion lai Chennaiyin FC-in match hnih khelh tawhah chak hmel an la hmu lo - Jeje Lalpekhlua khelhna club hian an match hmasa bera Atletico de Kolkata an inhnehtawkpui hnuah Ningani zan khan Delhi Dynamos an mikhual a, hnehna chang tura beisei ni mah se an mikhual team lakah hian 3-1 in an tlawm.

Mikhual team tan Marcelinho chuan minute 26-naah penalty aṭangin an hmahruaina goal hi a khung a, Chennaiyin tan Jeje-a ball siamsak chu Dudu Omagbemi-a'n an si phurh sut nan hmang mah se Brazilian forward Marcelinho bawkin Delhi hmahruaina goal a khung leh a, substitute Badara Badji-a'n minute 84-ah khung velehin mikhual team an tlangnel hle.

Chennaiyin tan Jeje-a'n hun ṭha nei fo mah se Hnahthial tlangval hi goal hmaah a vannei tawk lo a, substitute bench aṭanga tlanlut Jerry Lalrinzuala'n an goal thumna luhna kawngah Senegalese striker Badara Badji a ngam lo bawk.

Delhi Dynamos lamah Lalchhawnkima leh Lalruatthara awm mah se Hmunhmelṭha tlangval Ruatthara'n hmun a chang lo a, Champhai tlangval Chhawnkima'n inkhel bul ṭan lo mah se second half-ah tlan luhtir a ni thung.

Zanin ISL inkhelah FC Goa chuan Zodintluanga Tochhawng khelhna Pune City FC an mikhual dawn a, Pathianni zanah Delhi Dynamos hian Kerala Blasters an lenchilh ve lehnghal bawk ang.