Neymar-a'n goal 300 a khung tling ta

Brazil captain Neymar chuan Bolivia lakah goal hmahruai khungin an ram chu 5-0 in hnehna a chanpui. Neymar hian ram leh club tan belhkhawmin goal 300 a khung tling ta - kum 24 chauha upa a la ni!

Ningani zan South America World Cup qualifying inkhel dangah Uruguay chuan 3-0 a Venezuela hnehin table-a hmahruaitu an nih chhunzawm zel a, hetihlai hian Argentina erawh an mikhualna ramah Peru nen 2-2 in an inhnehtawk.

Goal 300

Olympic champion Brazil hian an mikhual Bolivia lakah zahngaihna an lantir lo chiang hle a, minute 11-na lekah Neymar chuan goal hmahruai a khung nghal. Barcelona forward hian Filipe Luis leh Gabriel Jesus te goal khung tur a siamsak bawk a, goal hnih dang chu Liverpool hmatawng Philippe Coutinho leh Roberto Firmino te khung a ni thung.

Kum 24-a upa Neymar hian Brazil tan senior level-ah match 73 a khelh aṭangin goal 49 a khung ta a, an ram tana goal khung hnem Pele (95), Ronaldo (67), Zico (66) leh Romario (56) te a um mek. Kum bithliah inelna U17, U20 leh Olympic-ah te belhkhawmin goal 18 a khung tawh bawk.

Club lamah chuan a bul
ṭanna Santos tan goal 138 a khung hnuah kum 2013 khan Barcelona a zawm a, Catalan club tan hian inelna hrang hrangah goal 95 a khung leh der tawh bawk, a kum leh a theihna ngaihtuahin record ropui a siam chho zel thei tura ngaih a ni.

Brazil coach Tite chuan, "Kan thawhrimna vangin result ṭha kan nei zel a, ka naute an zavaiin an khelṭhain tihtakzekna nen ram tan an inlan a, hnehna chan hi kan phu a ni," tiin a zawna match thum chhung hnehna an chan chhan a sawi.

Tite chuan Neymar fak chhunzawmin, "Kan captain a ni a, khelmual chhungah hotu nih a tlin tawh. A kum la tam lo deuh mah se tawnhriat a ngah tawh a, hetiang hun ropui tawn hi a phu a ni. Chutih rualin hmasawnna tur erawh a la nei ve tho, card hmu lo tura insum theihna a mamawh," a ti. Neymar hi a zawna vawi thum yellow card a hmuh tawh avangin Venezuela nen an inhmachhawn hunah a inlan thei lo ang.

Higuain-a goal a tawk lo

Argentina-in an thiampuipa Lionel Messi tel loin Peru an lenchilh a, thla hmasaa Atletico Madrid nen an inkhelh ṭuma
ṭhâl hliam Messi tel lo hian 2-2 in an inhnehtawk.

Ram tana goal khung hnem ber Messi tel lo mah se Argentina lamin goal an nei hmasa zawk, Everton defender Ramiro Funes Mori chuan minute 15-naah goal hmahruai khungin mualneitu an hawihai hle.

Peru an zam bik lo a, an ram tana goal khung hnem ber ni mek Paolo Guerrero chuan minute 58-naah an si phurh a sut. Kum 32-a upa striker hian ram tan match 73 a khelh
aṭangin goal 27 a khung ta.

Juventus striker Gonzalo Higuain chuan an hmahruai vawi hnihna ni turin minute 77-naah goal 'cool' zetin khung mah se mualneitu lam tan Christian Cueva chuan penalty aṭangin an si phurh a sut ve leh. Angel Di Maria, Sergio Aguero leh Paulo Dybala te vanneih ni a nih loh avangin Argentina-in goal dang an khung thei lo a, point khata an lungawi a ṭul.

Cavani goal hnih

Uruguay chuan hmahruaitu nih chhunzawm zel turin an mikhual Venezuela 3-0 in an sawp. Estadio Centenario-a in-khelah Uruguay tan Paris Saint-Germain striker Edinson Cavani chuan goal hmaah a hriam tawk a nih tih lantirin goal hnih a khung a, Nicolas Lodeiro chuan goal khat a khung ve bawk.

Oscar Tabarez-a enkawl Uruguay hian match kua an khelh aṭangin point 19 an hmu ta a, an hnuaiah hian Brazil (18) awmin Ecuador, Colombia leh Argentina ten point 16 ṭheun an hmu thung. South America aṭang hian a sang pali chu 2018 Russia World Cup khel turin an tling nghal dawn a, pangana chuan inter-confederation playoff an khelh a ngai thung dawn a ni.

Inkhel Results

October 7, Zirtawpni

Ecuador 3 - 0 Chile

Uruguay 3 - 0 Venezuela

Paraguay 0 - 1 Colombia

Brazil 5 - 0 Bolivia

Peru 2 - 2 Argentina

Fixtures

October 11, Thawhlehni Zan

Bolivia 1:30 AM Ecuador

Colombia 2:00 AM Uruguay

October 12, Nilaini Zing

Chile 5:00 AM Peru

Argentina 5:00 AM Paraguay

Venezuela 6:00 AM Brazil