Wimbledon an chhui mek

Khawvela tennis inelna upa ber nia sawi Wimbledon-ah dan bawhchhiatna a awm em tih Tennis Integrity Unit (TIU) lamin an chhui mek.

Kumin June 27 - July 10 chhung khan Wimbledon 2016 khelh a ni a, khawtual tlangval Andy Murray chuan Milos Raonic hnehin a vawi hnih nan champion nomawi a chawi.

Kum 2008 a din, tennis infiam-naah dik lo taka thamna leh eirukna a awm em tih endiktu Tennis Integrity Unit (TIU) chuan kumin Wimdledon-ah khan thil dik lo a awm em tih an zir chiang mek a, eng inkhel ber nge an chhui mek tih erawh an sawi lang tel lo.

TUI hian US Open first round-a Vitalia Diatchenko leh Timea Bacsinszky te inkhel pawh an chhui mek a, tunah hian July aṭanga September chhunga inkhel 96 zet chu chhui tura tih a ni.

TUI chuan, "Dikna haichhuah hi kan hna a ni a, eng ber nge kan chhui chian erawh sawi chhuah chi a la ni rih lo. Hmun hrang hrang aṭanga report kan dawnte chu endika bawhzui zel a ni ang," tiin thuchhuah an siam.