Honda laka rinna nghattu Marquez

Repsol Honda rider Marc Mar-quez chuan a team-ten an puih
ṭhat thu leh pakhatna ni thei tura an chungah rinna a nghah ngam thu a sawi chhuak.

Kum 23-a upa Marquez hian kumin intlansiak 14 awm tawh
aṭanga point 248 hmuin MotoGP world championship-ah hmahruaitu a ni mek a, amah hnaih bertu Valentino Rossi chuan point 196 chiah a la hmu thung - kuminah intlansiak hmabak pali a la awm. Champion lai Jorge Lorenzo chuan point 182 hmuin pathumna a ni mek bawk a, inlehthal thei vek an la ni.

MotoGP world champion vawi hnih ni tawh Marquez chuan, "Kuminah rider cheṭha an tam em em a, hmahruaitu ka nih theih chhan pawh ka vanneih vang a ni. Ka team-ten min pui ṭha em em a, nikum ang khan season tawp lamah vanduaina ka tawh tawh loh hram ka beisei," tiin a sawi.

Tun season-ah Marquez hi hnehna chang hnem ber niin vawi li a chak tawh a, rider hrang hrang pariat zetin hnehna chang tawhin an inel tawk hle. October 16 khian Japanese Grand Prix an tlan leh ang a, Grand Prix hnuhnung ber tur chu Spanish Grand Prix niin November 13 a tlan tur a ni.