Son a vul zual zel

Tottenham Hotspur forward Son Heung-min-a'n a season duhawm hman a chhunzawm zel a, club tana chet ṭhat mai duhtawk loin South Korea chu Qatar lakah 3-2 in hnehna a chanpui. Spurs tan Premier League match li a khelha goal li khung tawh Son hian Ki Sung-yueng goal khung tur a siamsak bakah goal khat dang a khung bawk a, Ji Dong-won chuan goal khat a thawh ve bawk. Defender Hong Jeong-ho chu minute 24 ala awm tihin hnawhchhuah ni mah se Korea hi an ṭang tlang thei.

Japan-in injury time-a Hotaru Yamaguchi goal khung chhawr ṭang-kaiin Iraq chu 2-1 in an hneh bawk a, team pahnih hi goal khat ve ve khunga an inhnehtawk reng hnuin substitute bench aṭanga tlan lut Hannover midfielder hlui hian an chakna goal hi a khung ta a ni. Saudi Arabia leh Australia inkhelah chak zawk awm loin an inṭhen a, team pahnih hi 2-2 in an ṭin. Mualneitu Saudi tan Taisir Al Jassim-a'n goal hmahruai a khung hnuah Australia-in Trent Sainsbury leh Tomi Juric hmangin an chhanglet a, Saudi Arabia tan minute 11-a la awm tihah Nasser Al Shamrani chuan an si phurh sutna goal khung ve lehin team pahnih an inhnehtawk.