Champhaiah goal leh inkhel hmuhnawm
Ramhlun North-in Chhinga Veng FC laka ṭum hnih an siphurh an sut hnuin player 10-a khel chungin injury time-ah chakna goal an khung. Dinthar FC-in goal hnih an humhim zawh loh avangin Zo United nen point khat an insem a, MPL1 champion-in table mawngphah an la chhuahsan thei lo.
Nimin khan Champhaiah Mizoram Premier League table hnuai lam club palite an inlan ve leh a, inkhel pahnihah goal kua zet lutin entu mipui ṭhahnem takte chu inkhel hmuhnawm an chhawpchhuah sak.
Goal 5 phawt
Chhinga Veng FC-in khawtual tlangval Zonunsanga Hmar leh H. Lalmuankima te hmanga ṭum hnih hma an hruaina chu Ramhlun North FC-in MC Malsawmzuala penalty leh Lalchhuanpuia te hmangin an sut ve ve a, injury time-ah Lalmalsawma hnawhchhuah ni mah se Lalruatliana Sailo hoten C. Ramdinmawia goal hmangin chakna goal an khung.
MPL kaithar pahnihte inkarah Ramhlun North-in an record neih
ṭhat an chhawm nung zel a, Lal-ruatliana Sailo hoten hian an match hnuhnung paliah ṭum thum an chak a, Chhinga Veng erawhin chak an nei lo.
Chhuanpuia ke vei lam
Ramhlun North midfielder Chhuanpuia-a'n box pawn aṭangin a ke vei lamin a pet goal a, Vaphai tlangval hian a ke vei lam thoin Aizawl FC lamah freekick a pet goal tawh. Ramhlun North forward Vanlalthlamuana goal hmaa a vanduai niah Chhuanpuia ke veilam a langsar a, injury time-a Ramdina goal khung pawh hi Vaiphai tlangval siam sak a ni.
Vanduaina
Chawngthansanga'n Chhinga Veng ṭum thum a enkawlah minute 90 leh a hnu lama goal an chhuah vang vekin an chak lo. MPL kaithar hian Aizawl FC an hneh loh ṭumin minute 90-naa goal an chhuah a, BVT leh Ramhlun North an hneh loh ṭum hian hun pek belh minute thumna ve veah goal an chhuah leh bawk.
Chhinga Veng hian an tlarhnung thawm ṭhat nan keeper ṭha Isaac Vanlalpeka an lakluh hnuah MPL3 best defender Emma Chigozie an lalut leh a, Nigerian defender pawh hian MPL kaithar hi point a hmuh pui thei lo.
Goal li dang
Inkhel hnuhnung zawkah Dinthar FC-in Michael Lalremruata hmangin minute 14 chhung lekin goal hnih an khung nghal a, Zo United an talbuai hman hle. Amaherawhchu Zo United-in corner leh freekick hmang ṭangkaiin first half-ah tho hian an siphurh an sut. Minute 22-naah Dinthar defender Lalremtluanga'n corner aṭanga ball kal chu an lamah a tilut palh a, minute 43-naah H. Malsawmtluanga freekick pet chu defender lu hmang thiam Lalnunpuia Pachuau-in an khuaa MPL a vawi khat khelhnaah a tauh lut.
Goal hniha hmahruai Dinthar FC-in hun ṭha an bawhpelh avangin MPL5-ah chak hmel an bawhpelhah a ngaih theih a, thlirna tlang dang aṭang chuan hun tawp hma hreta Zo United substitute Lalbiakkima'n chance ṭha bik a hlah avangin MPL1 champion hi an vanneiah a ngaih theih bawk.
Eng nge an sawi?
Dinthar FC coach Lalhlupuia Sailo chuan, "Goal hnih kan khung hnuah kan lamah ball kan awm tamtir lutuk a, kan goal neih kan hum thei lo kha chu kan thiam loh a ni. Point thum hmu turin kan thawkrim a, kan point hlawhchhuah zat erawh point khat a ni. Result ṭha nei chho tur chuan transfer hunah position tin deuh tho hi thuam chak a ṭul dawn a ni," tiin inkhelh banah a sawi.
Zo United manager James chuan, "Bench aṭanga lut a ni a, chance ṭha tak ni mah se hlah ve theih a ni. Ka hriatthiam pui khawp mai," tiin hun tawpa chance ṭha hlahtu Biakkima a chhan. Zo United forward Biakkima hian keeper chauh a hmachhawn bakah a sirah a teammate-te awm mah se a hun ṭha neih chu goal ban per nan a hmang.
ZoFooty Statistics
Ramhlun North 3 - 2 Chhinga Veng
RNFC : MC Malsawmzuala 64'; Lalchhuanpuia 83'; C. Ramdinmawia 90+3'
CVFC : Zonunsanga Hmar 52'; H. Lalmuankima 68'
MoM : Lalchhuanpuia, RNFC
49% Ball Posession 51%
13 Shot(s) 12
7 On Target 7
4 Yellow Card(s) 2
1 Red Card(s) 0
Powered By Rainbow Multibrand
Mobile Showroom
Tute nge inlan?
Ramhlun North (4-2-3-1) : Liansangpuia; Lalmalsawma, Lalramthlamuana, C. Ramdinmawia, Lalmuanawma; Lalruatkima Dosel, Lalchhuanpuia; Vanlalthlamuana (Jerry F. Zonunsanga 61'), Zosangliana (B. Malsawmzuala 80'), David Lalrinchhana; MC Malsawmzuala
Chhinga Veng (4-2-3-1) : Isaac Vanlalpeka; Lalramfelpuia (Vanlalhmangaihzuala 89'), K. Lalthlahlova, Emma Chigozie; Vanlalthlanga; Paul Ramfangzauva, Joseph Lalnunpuia; H. Lalmuankima, Lalchhanchhuaha (Isaac Lalremruata 70'), Zonunsanga Hmar (Lalthlamuana 58'); Lalkhawpuimawia
ZoFooty Statistics
Dinthar FC 2 - 2 Zo United
DFC : Michael Lalremruata 7', 14'
ZUFC : Lalremtluanga (OG) 22'; Lalnunpuia Pachuau 43'
MoM : Michael Lalremruata, DFC
46% Ball Posession 54%
9 Shot(s) 15
5 On Target 7
1 Yellow Card(s) 1
0 Red Card(s) 0
Powered By Rainbow Multibrand
Mobile Showroom
Tute nge inlan?
Dinthar FC (4-3-3) : Isaak Lalmuanpuia; Stephen Lalnunmawia, Lalremtluanga, VL Chhanhima, Lalbiakzuala (R. Lalnunmawia 57'); Siahmingthanga, Lalbiaknia, Joseph Lalṭhafela; Samuel Laltlanthanga (Sandeep Alay 87'), Michael Lalremruata, Lalruatpuia.
Zo United FC (4-2-3-1) : LK Hmangaihzuala; Vanlalruata, Lalnunpuia, Malsawma Chhangte, R. Lalthantluanga (Vanlalremsanga 79'); H. Malsawmtluanga, Laldinmawia; Laldinliana Varte, Isak Vanlalpeka (Lalṭhazuala 76'), Jesse Laldinpuia (Lalbiakkima 87'); Lalnunsanga.
Team Dinhmun
# Team Pld W D L GF GA GD Pts
1 Bethlehem VT 7 5 1 1 8 5 3 16
2 Chanmari FC 7 4 2 1 14 6 8 14
3 Chanmari West 7 4 1 2 10 5 5 13
4 Aizawl FC 7 3 1 3 7 5 2 10
5 Zo United 7 1 4 2 3 6 -3 7
6 Ramhlun North 7 2 1 4 6 10 -4 7
7 Chhinga Veng 7 1 2 4 9 13 -4 5
8 Dinthar FC 7 0 4 3 6 13 -7 4