Referee vanga chak lo kan ni - Chhinga Veng coach
Chhinga Veng FC-in coach thar Chawngthansanga hnuaiah a zawnin match thum an chak lo a, Chanmari West coach hlui hian match hnuhnung bera Ramhlun North an hneh loh chhan chu referee vang a nih thu a sawi.
Chhinga Veng coach Chawnga chuan, "Goal hmasa ber kan khung hma khan Ramhlun North defender kha a handball a, penalty pek kan ni lo. Ramhlun North defender Ramdina'n kan captain Joseph-a'n a tih goal khan yellow card ni loin red card hmu tur a ni. Thlamuana handball vanga penalty kan chawi khan a kut kha a taksaah a bet a, penalty tur a ni lo. Kan thinrimna ber erawh hun tawpa an goal khungna tura kan freekick chawi kha foul a ni lo a, Ramhlun North chakna goal kha offside a ni bawk," tiin Vanglaini palai hnehnah a lungawi loh thu a sawi.
Hemi hnu hian Chhinga Veng boss chuan, "Referee ṭha loin min ham reng dawn chuan MPL khelh hian eng nge awmzia awm, MPL ham tlak an ni lo," tiin a sawi. Chhinga Veng manager H. Lalremruata pawhin coach thusawi hi ṭawmpuiin, "Match hmasa lamah pawh referee tihsual vangin point kan hloh tawh a, kan fan-te buaina siam tur pawh kan inkhap dai ṭhin. Hetianga kan tihreng vang hian min zuam a ni. Tunah chuan kan inkhap tawh bik lo ang," tiin an ṭawngkamah an lungawi lo tih a chiang hle.
Chhinga Veng coach vuina tam zawk erawh Ramhlun North coach Lalruatliana Sailo (Tawia)-in a ṭawmpui lo. Tawia chuan, "Ramdina khan red card hmu se mak ka ti zawk ang. Ka awmna aṭang chuan Thlamuana kut kha a taksaah a bet lo a, referee thutlukna a ni. Kan chakna goal khung kha offside engtin nge huai takin a tih theih, a awmna aṭang khan offside a ni em tih a hriat lo ang," tiin Vanglaini palai a hrilh.
Ramhlun North coach pawh hian referee erawh a fak bik lo, Tawia chuan, "Kan la chak loh laia Chhinga Veng player-te'n hun an khawhral khan warning a pe lo a, inkhel kha a rorum deuh avangin hnung lam aṭanga tackle ham loh a tam bawk. Engpawh chu nise kan referee-te hi an la ṭan deuh a ngai a ni," tiin referee te chu ṭang turin a fuih.