Chelsea an chak - an hmaah champion Liverpool

Premier League club Chelsea chuan Europa Conference League semifinal first leg-ah 4-1 in Djurgarden an sawp a, an ke lehlamin final an rap tawh, tia sawi ngam a ni.

Blues tan Nicolas Jackson chuan goal hnih khungin, Jadon Sancho leh Noni Madueke ten goal khat ve ve an khung bawk a, mualneitu team tan Isak Alemayehu chuan goal khat a khung ve bawk.

Djurgarden hian ECL hi qualifying phase-a second round aṭangin an khel ṭan tawh a, semifinal lut turin match 16 an khel hman! Mahse, semifinal-ah meuh chuan Blues an tawng a, an tan an sang lutuk hret. May 8, Ningani zanah Blues hian Djurgarden hi semifinal second leg khel turin an mikhual leh ang.

Hetihlai hian semfinal lehlamah Real Betis chuan 2-1 in Fiorentina an hneh a, Spanish club tan Abde Ezzalzouli chuan goal hmahruai khungin, Antony chuan goal ropui bik a khung bawk - Italian club tan Luca Ranieri chuan goal khat a khung a, second leg atan beiseina an la nei ang.

Inbuatsaihna

Chelsea hian ECL nomawi chawi pawh ni se, a lawmman a ropui tawk lo - Europa League khelh phak a ni! Hei vang hian Blues tan season thara Champions League khelh phak chu thil pawimawh a ni.

Season laihawl vela champion sawi ri hman Blues hian tunah chuan UCL khelh phak an sawi leh tawh a, Djurgarden lakah pawh coach Enzo Maresca-a'n an league match hnuhnung bera bul ṭan aṭangin player pariat ngawt a siksawi!

Chelsea hian Pathianni zan dar 9:00-ah Liverpool chu league match khel turin an mikhual dawn a, London club tan UCL khelh phak a pawimawh avangin Maresca-a'n player a siksawi phah.

Djurgarden laka bench aṭanga lut Cole Palmer, Moises Caicedo leh Jackson te pawh Reds lakah chuan bul an ṭan a rinawm a, Liverpool lakah chak an tum dawn.

Kawng a inhawng

Ningani zan inkhelah Champions League khelh phak beisei zinga mi Nottingham Forest chuan 2-0 in Brentford an ngam lo a, Chelsea lawmah a tla - London club hi table-ah pangana an ni mek.

Season tharah EPL-a pangana chinin UCL an khel dawn a, tunah hian season tawp se, Blues hian Champions League an khel dawn tihna a ni. Mahse, a awlsam dawn lo - Liverpool zawhah hian Newcastle United (away), Manchester United (home) leh Forest (away) an la hmachhawn dawn!

Maresca tan fimkhur a ṭul tihna a ni - Liverpool ṭhatzia inhrilh nawn a ngai lo a, Magpies leh Forest hi UCL khelh phak tuma an elpui an ni a, United hi che chhe mah se, anmahni ang thoa club lian an hmachhawn chuan an danglam ṭhin.

Chelsea hian Liverpool lakluh tum Caicedo leh Romeo Lavia an chhuhsak lai khan, an fan-ten fiamthu nan Reds an hmang a, Pathianni zanah erawh Premier League champion hi 'guard of honour' nen an lo hmuah a ṭul dawn - hliam thawi dam nan chak a ngai.

Enchhinna

Chelsea tan Reds mikhual hi match pawimawh tawpkhawk a nih laiin, Liverpool erawh an champion tawh miau a, coach Arne Slot chuan tun season-a inlan tam lo player-te tan inlanna hun a siamsak tur thu a sawi.

Slot chuan, "Ka player ṭhenkhatten he team tana khelh an phuzia hi an pholang tawh a, training an nei ṭha a, club tana khelh an phu bawk. Ka player-te dinhmun hriat chian nan pawh a pawimawh a, season thar ka thlir der tawh a ni," a ti.

Dutch coach hian player zawng zawng a thlak hlawk dawn tihna a ni lo, tih a sawi a, chuti a nih chuan goal khung châka tuihal reng Mohamed Salah chu a awm dawn tihna a ni a, Wataru Endo leh Harvey Elliott pawh bul ṭan tura beisei zinga mi an ni.

Italian forward Federico Chiesa tan pawh Reds-a khelh a phu takzet tih pholanna remchang a ni dawn a, Jarell Quansah leh keeper number 2 Caoimhin Kelleher te pawhin chance an neih chhoh a beiseiawm.