Dubai-ah Dinsanga a chak

Mizo boxer ṭha Laldinsanga'n Dubai, UAE-a a inlan hmasak berah hnehna a chang. Ningani zan khan Crypto Fight Night-ah unanimous decision-in QuiMing Li a hneh a, pro boxing a khelh hnuhnung vawi liah ram dang boxer hlir hmachhawnin a hneh vek a ni.

Dinsanga'n a kut vei lamah na nei chungin Ramee Dream Hotel-ah ṭha takin round riat chhung a khel tluan a, thiamna leh theihna, ṭuan ran leh kawng hrang hrangah Chinese boxer QuiMing a hnek hneh viau a, round tin a la vek in, judge pathumin 80-72 vekin an chaktir.

April 25 khan an khua Lungleiah inhnekin round rukna laihawlah technical knockout-in Filipino fighter Bryan James Wild a lo hneh tawh. Chumi hnuah zin chhuak nghalin, ni ruk hnuah Dubai-ah ṭha takin a inhnek zui leh a, chutih laiin a kut vei lamah hliam tenau a neih avangin a ding lam a hmang nasa hle a ni.

Nikum November 30 khan kum 21 mi Dinsanga'n Bengaluru-ah WBC Youth bantamweight title chuhin, round riat an inbeih hnuah Michael Decardi Nelson (Ghana) a hneh a, kar khat pawh tling lo December 6-ah LPS Pro Fight bantamweight title a humhim a, Aizawlah amah chotu Omega Lalramdina hneh mah se he inhnek hi professional fight a ni lo thung.