Khelh hmabak a la awm - Postecoglou

Tottenham-in Ange Postecoglou hnuaia nomawi beiseina chhi nung turin Ningani zan khan Bodo/Glimt 3-1 in an hneh. Spurs-in bul an ṭan ṭha a, second 38-na lekah Brennan Johnson-a'n a khung. James Maddison leh Dominic Solanke te hmangin an khung belh leh a, Bodo/Glimt-in Ulrik Saltnes hmangin si phurh an sut ṭhen.

English club tan hun tawp dawna goal khat an chhuah a pawi thei a, chutihrualin Spurs hi final lut turin an dinhmun a ṭha takzet. Postecoglou-a'n team a enkawl tawhah season khatnaa nomawi a chawi loh pawhin season hnihna a champion ziah thu a sawi tawh a, kuminah pawh nomawi chawi thei dinhmunah a ding.

Spurs hian nomawi an chawi thei a nih chuan kum 2008-a League Cup an chawi hnua an champion lehna hmasa ber tur a ni a, an ngaihlu khawp ang. Chutihrualin second leg hi khualmualah an khel dawn a, Norwegian club khelmual hi artificial grass a nih bawk avangin English club hi la chesual ve thei an ni.

Postecoglou chuan, "Artificial grass-ah kan khel dawn a, football tho kan khel dawn tih hriat a ṭha. Celtic ka enkawl laiin an khelmual ka tlawh tawh a, kan mamawh tur pawh ka hria. First leg ang thoa kan khelh ṭhat a ṭul a ni," tiin a sawi.

Mahse, Bodo/Glimt an la tlawm lo. Coach Kjetil Knutsen chuan, "Tottenham-in goal an chhuah khan an hnual a, keini lam kan inti phur thung. Kan phurna kha second leg-ah chhawm kan tum dawn. Kan khelmualah chuan team dang daih kan ni," tiin a sawi a, Norwegian club hian semifinal lut turin an mualah Lazio an hneh a ni.