Anastasia hnehtu Sihphir

EverHome Pro Volleyball League an match hmasa berah Sihphir chuan Anastasia Electric Veng chu 3-1 (25-15, 25-23, 18-25, 25-21) in an hneh a, inelna sanga an inlan vawi khatnaah an duh ang result an nei.

Pro Division-ah Sihphir an awm ṭan chauh a, nikum khan Invitation Cup-ah vawi hnih inkhelin set la lo in an tlawm ve ve. Kumin March khan MVA Cup-ah ṭum li inkhelin set la lo bawkin an chak lo vek!

Mahse, Pro Volleyball atan Kerala player Niyas Abdul Salam la lutin a inlan hmasak berah point 23 hmuin 10 a hloh a, Kuriz Player of the Match lawman dawngin a team a chakpui nghal a ni.

An chak theih nan an player thar Lalhmunmawia'n (Mapuia) ṭum 10 vaw tlain vawi nga a tisual bawk a, set hmasa pahniha che ṭha Thangminlal Guite chuan point kua hlawh chhuakin point li a paih ve thung. Albert Zothankhuma'n point thum hlohin tum riat a hlap tla a, team danglam lantirin tualchhung player an khel ṭha tlang hle.

Anastasia erawh playoff aṭanga PVL khel leh chauh an ni a, an player neih sate hmanga inelna lian an hmachhawn a ngaih avangin an tan insiamṭhat nghal a harsa a, theihna an nei tih erawh a lang thung.

Insiamrem nan hun an mamawh rei deuh avangin Anastasia-in an tuar a, set thumna aṭangin ṭha pangngai takin khel mah se an ṭang tluan chhuak zo lo. May 5, Thawhṭanni zanah fiahna hautak zawk hmachhawnin Tuichangral nen an inhmachhawn dawn a ni.