Barcelona tan hmabak hautak a inchhawp

English Premier League leh Ligue 1-ah champion a chiang tawh a, Bundesliga-ah a chiang titih tawh bawk. La Liga erawh match nga chauh khelh tur la awmah champion tur a la chiang lo a, a la chiang mai rih dawn lo!

Copa del Rey champion Barcelona-in Spanish top flight league-ah hian hma an hruai mek a, an hnuai chiaha awm Real Madrid aiin point li chiahin an sang zawk - El Clasico an la khel dawn tih theihnghilh lo la.

Hetiang boruak karah hian Barca-in Champions League semifinal second leg khelh tur an la nei bawk a, Hansi Flick-a leh a naute an rim malh malh hle. Zanin dar 12:30 hian league match khel turin Real Valladolid an lenchilh dawn.

Barcelona tan champion beiseina ngah lutuk hi tun dinhmunah chuan buaina niin a lang ber a, Real-in league-ah an hnimhnaih ve reng bawk avangin a harsa dawn.

Engtin maw?

Zaninah league match khelin Barca an inlan dawn a, Thawhlehni zanah UCL semifinal second leg an khel lehnghal dawn. Mahni 'home' a inkhel tur ni se, a zia ang a, mahse, Italy-ah an zin a ngai dawn.

Italy an zin zawh aṭanga ni ngana lekah El Clasico khelh tur a awm nghal dawn bawk a, a tawi zawnga sawi chuan Barca hmabak hi a awlsam lo hle - Flick-a tan player remkhawm thiam a ṭul dawn tihna a ni.

Inter hi first leg-ah 3-3 in an inhnehtawkpui hram a, second leg a harsa dawn tih a chiang. Chuti a nih chuan Flick-a tan UCL hisap chunga zaninah player remkhawm a ṭul dawn tihna a ni a, fimkhur a ngai.

La Liga lamah lah Real-in an thlauhna hi point li chauh a ni a, vawi khat tawlhthluk zeuhah champion tur inthlak danglamna chance sang tak a awm - zanina Barca inrem dan tur hi hmuh châkawm tak a ni ta.

Barca vanneihna

Hetihlai hian Barcelona hian vanneihna an nei - zanina an hmachhawn tur Valladolid hi La Liga table mawngphah luah lumtu an ni a, an relegate fel tawh avangin khelh chhan langsar an nei tawh lo.

Flick-a tan Inter laka inkhel chau player-te dah ṭhat a ngamawm tihna a ni a, fimkhur erawh a ngai tel thung. Chuti a nih chuan Eric Garcia, Ronald Araujo, Fermin Lopez, Gavi leh Ansu Fati te chu inkhel bul ṭan vek tura beisei an ni.

Hliam vanga Inter pawh hmachhawn ve thei lo Robert Lewandowski-a'n dam lam a pan tawh a, mahse, bul ṭan nan a la hma - Flick-a tan 'match fitness' nei tura second half lama luhtir a fuhin a rinawm a, Inter an hmachhawn hunah Ferran Torres aia luhtir a ngamawm zui ang.

Hliam vanga rei tak a chawlh hnuah Marc-Andre ter Stegen a dam tawh a, German keeper hian zaninah chuan Wojciech Szczęsny hmun ruak a luah a rinawm a, Flick-a tan zanin hi player hliam dam leh te enchhinna ṭha tak a ni thei ang.

Kha le Madrid

Tun season-a nomawi chawi lo thei dinhmunah Real Madrid an ding mek - Copa del Rey final-ah Barca an ngam lo a, UCL-ah beisei tur a awm tawh lo a, an nomawi beiseina awmchhun chu La Liga chauh a ni tawh.

Pathianni tlai dar 5:30-ah Real hian Celta Vigo an mikhual dawn a, nomawi chawi loa season khar an duh loh chuan chetsual a thiang tawh lo - Celta Vigo hi season thara Europa League khelh phak tum an ni a, an tawh a khirh ang.

Hetihrual hian Real hian player indahṭhat chhan tur an nei tawh lo a, an theihna zawng zawng nen Celta Vigo an hmachhawn dawn. Copa del Rey final-a red card hmu Jude Bellingham-a red card chu hnuh kir a ni a, referee-in a red card pek chhanah, match official-te mawi lo taka tawng angin tarlang mah se, video-a en let a nih hnuah hnuhkir a ni.

Mahse, Real hi an ṭhat dan berin an inlan thei dawn chuang lo. Dani Carvajal, Eder Militao leh Eduardo Camavinga te chu hliam an neih sa a ni a, Ferland Mendy, Antonio Rudiger leh David Alaba te season tawp thleng an inlan thei dawn lo bawk - Rudiger hi Copa del Rey-a a chet dan avangin match ruk hrem a ni hrim hrim bawk.